ARTIKEL

Aplikasyen e-dagang dBazzar dikearap ulih seikas Alibaba

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Pelasar e-dagang ‘dBazzar’ ti dikemansang Sarawak deka nerima timbal ke chukup manah sereta maju nyadi aplikasyen tebilang dunya seikas Alibaba.

Kepala Menteri Datuk Patinggi Abang Johari Tun Openg madah, pelasar digital pemadu baru nya bisi pengulih rembus ngagai tikas entarabansa laban menua tu bisi pengelebih baka ngembuan mayuh produk nyelai.

“Aku andalka dBazzar deka ngubah chara komuniti ditu bedagang ukai semina dalam menua tang utai ke beguna diatu nya dalam e-dagang baka pemansut, kualiti enggau servis nganjung produk ngagai penguna.

“Nya entara pekara diguna ba dedini pelasar e-dagang. Nya kebuah kitai mesti bisi infrastruktur digital ti manah.

“Diatu kitai ba jeman 5G, reti iya arus internet mesti deras lalu infrastruktur mega mesti bekaul enggau hab entarabansa.

“Hab tu mesti disambung sekalika nengah Singapore, Hong Kong, Eropah tauka terus ngagai Amerika Syarikat (AS) laban kitai nagit makit dunya,” terang iya.

Abang Johari mansutka jaku nya ba Pengawa Ngelancharka Aplikasyen dBazzar di Wisma Bapa Malaysia, kemari.

Lebuh ngaga bida entara pelasar besai e-dagang Amazon enggau Ali Baba, iya madahka dBazzar ti dikemansang anak Sarawak mega bisi pengulih nyapai tikas ti sebaka.

“Seagi kita bisi pangkalan data, penguna enggau produk ti nyelai baka Pua Kumbu, kantung sandik enggau ke bukai nya ulih dijual ngagai serata dunya enggau syarat kitai bisi infrastruktur.

“Perintah Sarawak benung beratika siti pekara besai dalam pelasar e-dagang iya nya infrastruktur servis kelebih agi ba menua pesisir.

“Infrastruktur bukai ti diguna baka servis nganjung produk, enti penguna nya ari AS deka meli produk kitai, reti iya sistem nganjung produk mesti bisi lalu servis kargo mesti nitihka taga nentuka produk diudar terus dianjung,” terang iya silik.

Nambahka nya, iya meransang nembiak Sarawak terus ngasilka penemu ti inovatif ngambi nyapai juluk menua dalam ekonomi digital.

Ba lansa sama, Abang Johari udah nganjung peminta ngagai Bank Negara Malaysia ngambi numbuhka bank digital Sarawak.

“Enti peminta nya dikemendar, Sarawak deka bisi bank digital kediri. Infrastruktur digital tu deka ngemuntangka pengawa kitai ngemansangka e-dagang enggau ngerembaika aplikasyen ti ulih nguasa dunya,” ku iya.

Ungkup penerang semua, dBazzar nya aplikasyen super ti ditengkebang, dikemansang enggau dikembuan rayat Sarawak lalu bisi semua dalam siti pelasar digital baka direktori e-niaga, e-dagang, e-logistik, e-kesetiaan enggau e-ganjaran.

Sama datai Chairman Sains Datuk Patinggi Tan Sri Dr George Chan, Menteri Kaunsil Kandang Menua enggau Pengawa Berumah, Datuk Seri Dr Sim Kui Hian enggau Sekretari Perintah Sarawak, Datuk Jaul Samion.

BERITA LAIN

Jasa indai meruan dikenang

KUCHING: Kaunsil Peranak enggau Pemansang Ruang Bilik Menua (LPPKN) udah mujur ngatur Pengerami Hari Indai Renggat Nengeri Sarawak 2024. Bisi 400 indai udah sampal datai

Penyulut SPM meri pengaga ngagai semua

KUCHING: Bulih pemutus peresa nyulut ba Sijil Pelajaran Malaysia (SPM) 2023 ukai penyulut siku orang aja tang nya penyulut semua raban. Nembiak Sekula Sekondari (SMK)

Saripah Tuah angkun ngangkat pesaka Bisaya

ANGKUN deka nyaga kereban asal raban bansa Bisaya, Saripah Tuah, 44 bejalaika dagang ngelakuka semua kereban tradisional Bisaya awakka enda punas disegang arus pemansang dunya

BERITA TERBARU

Aseh harap isu ‘surat layang’ segera diselesaikan

PETALING JAYA, Selangor: Jawatankuasa Integriti Persatuan Bolasepak Malaysia (FAM) berharap isu ‘surat layang’ dapat dinoktahkan segera selepas siasatan terhadap dua dakwaan salah guna kuasa melibatkan