MIRI: Semua bansa endang bisi ngembuan, nyimpan sereta mandangka main asal diri ti dikemegahka.
Nya alai Tuai Komuniti Iban Miri, Penghulu Randi Elon ngandalka rebak baru ulih begempung dalam serakup baka Kelab Main Asal ngetanka main asal lebih agi Ajat Iban.
“Aku mega ngarapka pungka lelaki kelab ngembuan ngepan ke genap dikena nyediaka diri maya Parade Mirifest diatur bulan Mei ninting taun.
“Chukup rindu meda pengawa kita sehari tu ti ukai semina ulih mandangka pemanah ajat asal kitai Iban tang mega tu mih sebagi ari pesaka budaya aki ini kitai menya.
“Nitihka kenang leka ensera enggau sebut leka tusut, main ajat tu keterubah dipelajarka bansa Iban ari Petara siku ti benama Ulup Baru Lichin, Bujang Ilang Lengain.
“Tang cherita ti nyentuk agi enda ulih dipansik laban orang ke tuai ti ditampung enda ulih madah enggau nyemetak,” ku iya ngelansa.
Penghulu Randi Elon mansutka jaku nya lebuh dikangau nyadi temuai dipebasa ba Pengerami Tamat Program Belajar Ngajat diatur Kelab Belajar Ngajat Miri di Restaurant Busang Jelini ditu, Hari Enam nyin tadi.
Iya mega andal amat raban kelab nya ulih ngatur mayuh agi program main asal baka kelas belajar betabuh, gendang pampat enggau main nyawa baka beramban enggau bepantun udah tu.
“Aku bisi amat pengandal ngagai kelab tu nyadika pelasar nyaga, ngibun enggau ngangkatka main asal dikembuan bansa kitai laban nadai orang bukai ulih dikeandal enti ukai kitai empu.
“Kelimpah ari nunjukka pengeraja bansa nya ba main asal, tu mega ulih nyerakupka bansa laban kitai bisi ngembuan sereta bepenemu ba main ti sama.
“Nya alai, ngajat sereta main asal ke bukai patut bendar dipelajar sereta dikembuan bansa Iban dikena ngelai bansa diri, dikena mandangka pengeraja main asal sereta dikena beserakup,” ku iya nyemetak madah.
Nambahka nya ku Penghulu Randi, lebuh ke belajar ngajat, kitai mega belajarka jalai basa enggau jalai ngemas diri ba mua orang mayuh.
“Kitai bansa Iban ngembuan mayuh macham tanda ti dimain sida nyerumba tempap gendang enggau tabuh; engkerumung tawak enggau bebendai sereta sekeda ngena tebah Sape Orang Ulu.
“Ari semua tanda, ngajat tu siti ari tanda ti pemadu dikerinduka sida sereta mengkang dipelajar datai ke sehari tu baka udah dikereja bala kita tadi.
“Main asal tu mega tau narit ati orang nemuai ngagai menua kitai ti tau mai penatai pemisi,” simpul iya.
Ke penerang semua, Program Belajar Ngajat tu betuaika Cornelius Kawat Ugi lalu diembing Guro Linggi Sanaong ke alai bisi 20 iku udah masuk program renggat keterubah diatur pengelama seminggu.
Sida betubuh 20 iku ngepunka pengawa belajar ngajat kena 9 November nyentuk 13 November tu tadi lalu tamat dirami ngintaika ujung minggu kena 14 November di Palan Aktiviti Orang Tuai Miri (Pawe) ditu.
Kelab Belajar Ngajat Miri tu ditumbuhka seraban profesional Iban datai ari mayuh batang pengawa baka orang gawa perintah, sektor minyak enggau gis ti rinduka main asal.
Kelab tu betuju ngajar mayuh agi orang nemu pasal main asal lebih agi Ajat Iban ngambi main asal tu semampai bisi dipeda rebak dudi lalu ditampung sida jemah ila.
Kelimpah ari nya, kaban kelab mega andalka diri ulih matak mayuh agi orang nemu Ajat Iban lalu ulih mandangka pengeraja budaya bansa asal tu ngagai bansa bukai ti meda.
Genap iku sida ke tamat mega dipinta mantaika ajat ke udah dipelajar ba mua mayuh enggau mayuh macham bungai ajat dibantai.
Sebedau mantaika bungai ajat, dulu sida nyembah meri basa ngagai orang ti ngemata.
Udah nya baru sida ngatur singkang nitihka rentak tabuh, entepa kiba peling kanan lalu bisi nya chundung baka ke deka rebah.
Pia mega bediri baka ke tejingkauka sadau, meremi baka ke terengkah ba tikai seraya jari dikepai, kaki disingkang.
Ama surut, ama mansang, nerais sereta engkechit, merejuk sereta manjung sereta terabai dijapai lalu dipegai.
Ilang disintak lalu dibiau, lesung dipanggum jari dikitau lalu pala gilik-gilik, buah isi getik-getik, mata kalik-kalik.
Sama dikangau datai ngerami sida ke tamat belajar ngajat sehari nya Chairman Kelab Golf Dayak Miri, Dana Empading enggau tuai raban bansa Iban ke bukai.
