Aram berandau seraya beperindang ba Panggau Kitai

KUCHING: Panggau Kitai sebuah program ngena Jaku Iban ke mai bala penanyi tauka orang ke tebangkar ba sebengkah pengawa ngambi berandau, meri sadang penemu enggau bejuraika batang randau lenak agi.

Juluk program tu deka ngangkatka industri muzik Dayak sereta bekelala semak agi enggau orang ke landik, bepenemu, bepenau pasal pekara dikerandau kelimpah bekunsika peneleba sida dataika nyapai penyulut.

Nya alai, simpul penemu ari randau nya dikearap ulih nyadi teladan tauka peransang ngagai mensia mayuh kelebih agi ngagai raban nembiak kemaya hari.

Nipakka rambai jaku Berandau Seraya Beperindang ti dipilih, bisi lima pekara deka diangkat lalu dipejurai ba program tu baka pemansang, pengawa dagang, politik, dagang temuai nyengkaum pemerindang.

Entara penanyi ke bisi dikangau ngemujurka program tu CJ Charlene, Eisner Nala, Isa Lee, Allesandro Allex, Suzy K, Jeffery Tegong enggau Pamelia David.

Kelimpah ari sida nya, orang bukai ke anda penemu tauka udah pegari nama ba sebengkah pengawa mega bisi dikangau baka Pengajar Lin Asit (Bepantun), Jimmy Joseph (Ngajat), Mummy Pat (Pedagang) enggau Nicklane Aboy.

Priscilla John enggau Steward Dawi udah dilempaika pengandal nyadi hos program Panggau Kitai ti ulih dipeda kita ninting Hari Minggu, urung pukul 3 lemai ba TVS, Channel 122, Astro enggau myFreeview.

Suara Sarawak