Aram besaup enggau BondNeo Hope mantu orang tusah

BETONG: Unit Kaunseling enggau Alumni Kolej Vokasional Betong bekerejasama numbuhka sebengkah gerempung ukai dikuasa perintah (NGO) dikumbai BondNeo Hope.

Siku ari kaban iya, Sangin Juat madahka penemu numbuhka gerembung nya ditibak ari program Simfoni Kasih.

Ku iya, perambu nya dikemujurka dua iku senior dalam industri Pelajar Teknikal enggau Latih Vokasional (TVET) ti rinduka pengawa pengasih.

“Tiga iku pemungkal BondNeo Hope ke bukai nya datai ari graduet palan pelajar tinggi menua tu ti ngembuan juluk ke sama, ngembing chara baru bejalaika pengawa pengasih.

“Nengah gerempung tu, kami deka narak nembiak rebak baru awak ngembuan sereta ngemeran ulah ti siru enggau ati kasih ngagai raban diselinting,” ku iya lebuh dirandau Suara Sarawak.

SANGIN JUAT

Nya alai sida sebuat andalka diri ulih mantu mayuh agi raban I begunaka bantu nengah inisiatif begulai nipakka misyen mai ekosistem baru ngagai raban nya.

“Baka udah dipadah aku dulu tadi, niat kami sebuat numbuhka BondNeo endang dikena meransang bala mayuh ka bisi ati sereta penyiru sama besaup, betulung mantu orang bukai.

“Projek keterubah diperambu kami nganjung pemeri ngagai sekeda ruang bilik nyerumba ngintu Hari Krismas ti deka datai.

“Nya alai besai amat pengandal kami ngagai mensia mayuh bela gerah jari ngemujurka pengawa tu, abis nadai meri pengelantang ngagai sida ke nerima pemeri tu ila,” terang Sangin.

Ke penerang, BondNeo Hope komited nyadi sebuah NGO pengasih ti mantu orang seranta di Sarawak kelimpah ngajar sida nya pasal chara ngulihka pengidup menyana agi.

Tanya enggau penerang silik pasal program dipejalaika BondNeo tau telefon ngagai Sangin empu ba lumur +60 11-1586 1331 tauka Sulfri Harris (+60 17-382 1002).

SULFRI HARRIS

Suara Sarawak