Aram enggau Serakup Tajai Sarawak nempa rikod begendang pampat

SIBU: Serakup Seni enggau Main Asal Tajai Sarawak tauka Serakup Tajai Sarawak deka nempa rikod dalam Malaysian Book of Record (MBR) bemain gendang pampat.

Presiden iya, Themotty Jagak madahka rikod nya deka ditempa nengah rambai jaku ‘Seribu Gendang Seribu Minit’.

Ku iya, nitihka perambu asal program nya diatur bulan June tu tadi tang dilanjar ketegal pengerekai igi penyakit Covid-19.

“Nyadi diatu kami deka ngaduka baru program tu lalu agi ngiga bala ti sama bisi pengangkun ke main asal nempap gendang pampat tu.

“Kitai sama nemu, gendang pampat sebengkah main asal bansa Dayak Iban ti majak lenyau diatu.

THEMOTTY JAGAK

“Nya kebuah kami keran amat matak bala bukai lebih agi rebak biak rindu enggau angkunka main asal tu ngambi enda lenyau diseruyut arus pemansang,” ku iya lebuh dirandau Suara Sarawak.

Themotty madahka tuju serakup ngatur program tu dikena ngenang enggau nyaguka adat budaya dikembuan kitai ti nyadika kelai bansa Iban.

Nengah program tu mega, sida andalka diri ulih ngempung semua Dayak ba Pulau Borneo nyengkaum ari Sabah, Kalimantan enggau Brunei ba main asal.

Nambahka nya, serakup tu merambu ngatur program nya begulai enggau Kelab Seni enggau Main Asal Dayak (Kemada) Sibu, Kelab Gendang Pampat enggau Main Asal Kuching, Serakup Ngasi, Dayak Bukit Kelingkang (DBK) enggau serakup ke bukai ari Bintulu, Miri enggau Sibu.

“Pengawa tu deka diatur baru enggau ngempuru bala ke landik sereta rinduka pengawa tu kelimpah ngansah pengelandik diri nempap gendang.

“Aku besai amat pengandal perambu tu nerima sukung bala mayuh nipakka tuju enggau juluk ngangkatka nama Dayak ba pengawa ngetanka muzik enggau main asal bansa kitai.

“Ari nya aku ngarapka bisi bala gerah jari nyaup kitai ba pekara belanja ngambi pengawa begendang tu mujur lalu juluk nempa MBR deka dijapai.

“Enti ukai kitai, sapa agi ulih dikeandal lalu enti ukai diatu, kemaya kitai ulih ngangkatka main asal diri. Nadai orang bukai deka nyaup kitai enti ukai bansa diri empu,” ku Themotty nibarka jaku peransang.

Barang sapa ti deka nyadi kaban tau ngisi pom lalu tau mega ngelawa facebook Gerempung Tajai Sarawak tauka nganjung pesan nengah Whatsapp Themotty Jagak ba lumur, 01125019627.

LANDIK BEGENDANG… Sekeda ari bala kaban Serakup Tajai Sarawak ke mantaika gendang pampat lebuh pengawa bejadika serakup sida nya taun nyin tadi.

Suara Sarawak