KUCHING: Mensia mayuh diperansang ngulu program nyual ngenyit tikit Pengerami Muzik Kampung Ujan Dunya 2023 (RWMF23) ba tiga palan bebeli barang ba Sarawak pengelama tiga hari berengkah ari pagila (9 June).
Sebengkah penerang ari Kaunsil Dagang Temuai Sarawak (STB) kemari, program nyual ngenyit tikit nya deka diatur ba Vivacity Megamall Kuching, Plaza Merdeka Kuching enggau Bintang Megamall Miri berengkah ari pukul 10 pagi nyentuk 10 malam.
“Mensia mayuh ti meli tikit ba ketetiga palan tu bepeluang nyabut tikit benasip dikena menang tikit tambah RWMF23 bepelasar ke atur ti udah ditetap,” ku STB.
STB madah, tikit jual tumu nya nyendia bemacham kategori baka tikit tama sehari orang besai tuai berega RM230 ungkup Hari Lima tauka Hari Minggu lalu RM260 enti Hari Enam.
“Tikit tama dua hari orang besai tuai iya nya RM440 ungkup Hari Lima enggau Hari Enam tauka Hari Enam enggau Hari Minggu sereta RM590 enti tiga hari bejurut.
“Pia mega, tikit ungkup bala nembiak mit enti sehari RM80 tang tu bisi tatak,” ku penerang nya.
RWMF renggat ke-26 taun tu deka meri peneleba nyelai ti ngempung muzik, main asal enggau rampa menua sereta deka dipasuk bala pemuzik menua tu empu enggau antarabansa kelimpah ngerami penyelai begulai.
“RWMF 2023 sekali tu deka mantaika bala artis menua luar baka champion Anugerah Grammy, Gipsy Kings ari Perancis, Big Mountain ari Jamaica, Safi Theatre ari Tanzania, Rastak ari Iran, Fasylive ari Maldives, Afriquoi ari United Kingdom.
“Pia mega, Chatusram ari India, Rizal Hadi & Fol ari Indonesia, Thai Fusions Sound Band ari Thailand enggau mayuh agi ti bukai nyengkaum ari Jipun, Hong Kong sereta Singapore
“Sekeda atis menua tu empu ti deka ngaga eksibisyen ba TWMF taun tu baka Zee Avi, Suk Binie, APU, Nadir, Steve Thornton Band, Sada Borneo, Tuku Kame, Nading Rhapsody, Geng Wak Long, Buloh Berkocak, At Adau, Meruked sereta Orang Orang Drum,” ku STB.
Taun tu, RWMF 2023 ti bepelasar ke rambai jaku ‘Refleksyen’ meri peluang ngagai bala pengusung ti ngulu pengerami nya ukai semina ngaul muzik enggau main asal dunya tang begulai belemati ke reti rambai jaku nya.
“Tu meh maya kitai patut belemati ke kaul enggau rampa menua sereta bemacham muzik dikena ngelala menua luar enggau silik agi,” ku STB.
Mensia mayuh ti deka nemu silik bekaul bala pemuzik, tikit enggau ti bukai diperansang ngelawa website rasmi RWMF ba rwmf.net.
