KUCHING: Gerempung Anak Borneo Semenanjung (ABS) deka ngatur Pengerami Ngabang Uniti Gawai-Kaamatan 2023 kena 24 June (Hari Enam).
Presiden ABS, Gangging@Ling Sanggau madah, tuju pengerami nya diatur dikena ngempung semua orang nadai ngira bansa enggau jalai pengarap ngintu Pengerami Ngabang Uniti Gawai-Kaamatan 2023.
Ku iya, naka diatu pengerami nya ukai semina dipasuk peranak menua tu empu tang bela dipasuk temuai ari menua luar.
“Tu nyengkaum bala temuai ari menua Brazil, Uganda, Eropah sereta bala duta ari sekeda menua luar lalu sida udah meli mija.
“Tu siti berita manah laban temuai ari menua luar deka berami enggau kitai ngintu Pengerami Gawai-Kaamatan.
“Kebuah pia ngambi sida ulih ngelala penyelai main asal sereta penyerakup rayat ba menua tu kelebih agi Sabah enggau Sarawak,” ku iya.
Iya madah, naka diatu sida bisi nyendia 120 mija ti ngembuan empat kategori lalu ba siti mija semina ungkup 10 orang aja.
Empat kategori mija nya nyengkaum kategori Diamond ti berega RM2,000 sebuah mija, kategori Platinum berega RM1,800, kategori Gold berega RM1,500 enggau kategori Silver berega RM1,200.
Ku iya, pengerami nya deka diatur ba Top Happiness Grand Ballroom Mines 2, Seri Kembangan, Selangor berengkah ari pukul 6 lemai.
“Mayuh aktiviti deka diatur maya tu ila baka Pekit Ratu ABS 2023, Pekit ABS Idol 2023, Pekit Nengkebang Pisin enggau mayuh agi aktiviti bukai.
“Pekit Nengkebang Pisin tu deka dipasuk bala penengkebang pisin Borneo lalu pekayan ti digaga sida deka dipandangka bala model enggau bala penyereta Pekit Ratu ABS 2023.
“Champion ba Pekit Ratu ABS 2023 deka terus diambi gawa ba Serikat Penerebai Bilun MYAirline,” terang iya.
Ling madah, entara temuai dipebasa ti deka ngulu pengerami nya baka Menteri Penyerakup Bansa ti mega Kaban Parlimen Kanowit, Datuk Aaron Ago Dagang, Sapit Menteri Ekonomi ti mega Kaban Parlimen Mukah, Datuk Hanifah Hajar Taib, Sapit Menteri Pengangkut ti mega Kaban Parlimen Limbang, Datuk Hasbi Habibollah, Tengku Hishammuddin Zaizi enggau ti bukai.
Mensia mayuh ti deka nemu silik bekaul pengerami nya diperansang betanya terus ngagai Ling empu ba lumur 010-5238895, Serit ba lumur 010-8667244, Arif ba lumur 013-8314628, Gilbert ba lumur 019-5598004, Adal ba lumur 012-3551904 tauka Clarence ba lumur 017-6219929.
