KUCHING: Sarawak deka mandangka seni kreatif, seni pemerindang, pengawa ngeluar enggau kraf jari menua tu ba Pavilion Nengeri Tamu Pengerami Bup Antarabansa Kuala Lumpur (PBAKL) Ke-40.
Kelimpah ari Sarawak, PBAKL ti deka diatur kena 26 Mei nyentuk 4 June ba Palan Dagang Dunya (WTC) Kuala Lumpur deka ngagauka China nyadi Menua Tamu enggau Opis Menteri Pelajar nyadi Opis Menteri Tamu.
Sekretari Mendam Opis Menteri Dagang Temuai, Industri Kreatif enggau Seni Pemerindang, Datuk Sherrina Hussaini madah, entara main asal enggau seni pemerindang ti deka dibantai baka pengawa bemukun tauka nopeng, ngajat, sape, songket enggau mayuh agi ti bukai.
Ku iya, Sarawak mega bela bejalaika pengawa bejual baka nyual bup ti dikeluar khas Pustaka Nengeri Sarawak enggau bala pengeluar nengeri tu, kraf jari, kek lapis enggau langkau gambar pekayan asal Sarawak.
“Juluk Pavilion Nengeri Tamu tu dikena ngelakuka industri dagang temuai enggau pengawa beranakka puku ba Sarawak.
“Pia mega, mantai sereta negapka main asal, seni, industri bup enggau pengawa ngeluar ba Malaysia kelebih agi Sarawak,” ku iya rambau aum pemberita ba Pustaka Nengeri Sarawak, ditu kemari.
