KUCHING: Yayasan Farley begulai Opis Bomba enggau Penyah Penusah Malaysia (JBPM) Sarawak deka ngatur Malaysia Day Community Fun Run 2023 kena 17 September tu.
Presiden Yayasan Farley, Eijing Lau madah, pengawa belanda pengasih tu diatur ungkup ngumpul belanja dalam mantaika penyedar ngagai raban organisasyen.
“Kami nagit urung 2,500 iku penyereta ulih ngulu pengawa nya lalu andalka mensia mayuh mega ulih ngulu.
“Pengawa tu mega siti ari chara pemadu manah negapka semangat diri empu,” ku iya.
Eijing bejaku munyi nya rambau Kimpin Pengelikun Rumah Angus Serimbai Gawai Dayak 2023 enggau Pra Ngelancharka Hari Malaysia Community Fun Run 2023 di Farley Supermarket barang ditu, kemari.
Ku iya, sida pechaya pengawa tu ulih meransang minat sereta peluang ngagai genap rayat neruska pengidup sida.
“Rejister udah dibuka berengkah sehari tu lalu haribulan kepenudi kena 1 Julai tu ila.
“Bayar rejister semina RM78 siku ke alai 500 iku ti pemadu tumu rejister deka ngasaika diskaun RM58 siku.
“Aku andalka pengawa tu ukai semina dikena ngumpul belanja enggau narak penyedar aja, tang ulih ngerapitka kaul komuniti kitai,” ku iya.
