Aram rejista diatu ba MySPR Daftar

KOMITI pengawa bepilih besai (SPR) baru udah ngelancharka portal pemadu baru sida dikumbai MySPR Daftar.

Nitih ku penerang ari SPR, portal nya deka ngemuntangka agi rayat Malaysia rejista nyadi pengundi nengah chara online.

Kelimpah ari nya, bala pengundi bukai mega tau nukar adres ngundi sida ba portal tu.

Enti sema mensia mayuh deka meresa penerang pasal rejista pengundi, sida tau ngelawa website https://pengundi.spr.gov.my/

Semua kitai mega nemu Perintah Besai udah ngubah Rang Undang-Undang Konstitusyen (Ubah) 2019 ti nginsur umur ngundi ari 21 ngagai 18 taun.

ARAM SAMA REJISTA… Brochure MySPR Daftar ungkup sida ti baru deka rejista nyadi pengundi enggau nukar adres endur ngundi.

Nya kebuah piak SPR ngadang penyampau tubuh pengundi maya Pengawa Bepilih Besai (PRU) Ke-15 ila manggai lebih 22 juta dibanding 14.9 juta pengundi lebuh PRU14 taun nyin tadi.

Nengah MySPR Daftar, penguna ukai semina ulih ngisi pom rejista pengundi chara online aja tang mega ulih nganjung peminta nukar adres endur ngundi.

Berindik ari nya, rejista pengundi nengah online tau dipejalai ba website https://mysprdaftar.spr.gov.my/

Peminta ti dianjung kena pukul 8 pagi nyentuk 12.00 tengahari maya hari opis gawa deka diadu ba hari ke sama seraya peminta dianjung ngelui ari jam nya tauka maya hari opis nadai gawa nyengkaum kemisi Hari Besai, deka diadu ba hari gawa entudi nya.

Pemesai SPR deka meresa rejista akaun chara manual lalu pengudah semua penerang dituku betul, siti email kena aktif akaun deka dianjung ngagai email kita ngambika diaku.

Nya alai SPR meransang barang sapa bedau rejista nyadi pengundi nadai ngira umur tauka sida ti deka ngemaruka adres ngundi, tau ngelawa website ti udah dikunsi kelimpah ngelawa opis pampang besemak ungkup penerang enggau tanya silik.

Suara Sarawak