Aram sama gerah jari mantu Teresa

KUCHING: Gerempung Anak Borneo Semenanjung (PABS) nesau mensia mayuh sama gerah jari mantu siku indai tunggal benama Teresa Santa Angil, 44 taun ari Sarawak.

Ba sebengkah penerang Facebook PABS madahka tudah Teresa ti diau ba Puchong, Selangor diatu benung suntuk belanja.

“Peranak asal Engkalat Bukit Aub, Sibu kediri aja ngimpun anak lima iku ke beumur 17, 13, 11, empat enggau dua taun.

“Tudah tuai ditinggalka laki iya lebuh ribat anak pengkuan tiga taun ke udah lalu enda ulih gawa laban beribunka anak ke agi mekang,” ku penerang nya.

Nambahka nya, rumah suwa sida Teresa udah dua taun nadai dibayar kelimpah semina nerima pemakai ari pengasih mensia mayuh.

“Laban nadai belanja mayar van sekula, Teresa bedarat nganjung anak iya ke sekula pengelama setengah jam.

“PABS enggau Rumah Sarawak bisi mantu sida Teresa sebilik, lalu kami ngarapka mensia mayuh sama gerah jari mantu tudah,” ku penerang nya.

Mensia mayuh ti deka meri bantu ngagai Teresa sebilik tau bank in duit ba akaun Teresa empu, 101142132611 (Maybank) tauka betelefon ngagai lumur 0172042183.

PENGASIH MENSIA MAYUH… Bala anak Teresa nerima bantu ari PABS enggau Rumah Sarawak. GAMBAR FACEBOOK PABS.

Suara Sarawak