Arap 2021 bisi pemansang ke lebih manah

KUCHING: Taun Baru 2021 diintu enggau penuh pengarap ngambika menua lebih mansang ke pemaik rayat Malaysia kelebih agi di Sarawak.

Pemungkal Gerempung Pemikir Dayak Sarawak Wellie Henry Majang ba siti penerang media begulai madahka, taun baru diintu dikena ngelaika pun pekara ti manah agi sereta enggau naka ulih ngemunaska pengurang ti bisi.

“Pekara tu nadai reti enti kitai enda bebendar sereta enda mujur nerangka siti pekara nya.

“Ubah aja enda chukup, pekara nya mesti dikereja nitihka pemereti ngagai ubah ti deka dipejalai,” ku iya, kemari.

Ku Willie, pengerekai igi penyakit Covid-19 ba taun 2020 ngujungka rayat napi mayuh macham penusah.

Wellie Henry Majang

“Pengawa nitihka atur enggau manah patut nyadi fokus lalu nyungkak ngagai tikas ti manah agi ungkup rayat Sarawak,” ku iya.

Nangkanka nya, Wellie madahka taja pia, penanggul ba perengka pengangkut, nadai mesin pemansut duit automatik (ATM) ba menua ulu enggau menua pesisir seruran nyadika penangul rayat ba nengeri tu.

“Ambika chunto, maya rayat deka mansutka duit ari Bantu Sara Idup (BSH) napi penusah laban nadai servis ATM ke semak.

“Pekara ti chukup ngenusahka sida kelebih agi lebuh berintai panjai tang pulai enggau ati asa laban mesin ATM enda ulih dikena ketegal servis enda manah tauka abis duit,” ku iya nerang.

Kelimpah ari nya, iya madahka bala pengereja bank mega napi penanggul lebuh betemu enggau ulah mensia mayuh laban udah lelak nganti.

Elias Lipi Mat

“Pekara ti pemadu tusah kelebih agi enti sida ke datai nya ngembuan penyakit baka lumpug, orang tuai tauka buta.

“Sida ke diau ba menua ulu, bantu wang RM500 ngagai RM1,600 nya chukup beguna tang ngulihka duit nya enda muntang didinga laban pejalai ti jauh sereta ungkus bayar tambang ti besai,” ku iya nambah.

Ba lansa ke sama, iya madahka penanggul tu ulih diputarka enti sema bisi servis bank tauka nambahka penyampau mesin ATM ba menua ulu.

Berebak enggau nya, Presiden DTTAS Elias Lipu Mat madahka, kelimpah ari servis ATM, penanggul nadai internet di Sarawak enggau infrastruktur ti enda meruan ba negngeri tu mega entara penanggul ti diasaika rayat.

“Tu meri penanggul ngagai sistem pelajar nengah tali arus sekumbang Atur Terit Pejalai (PKP).

“Servis infrastruktur enggau internet chukup beguna lalu pengawa enda ulih nyendiaka servis tu ngasuh pengawa pelajar nengah talu arus enda ulih dipejalai enggau manah,” ku iya.

Ku iya nambah, agi mayuh nembiak ba menua pesisir kelebih agi ba menua ulu enda ulih nitihka pengawa belajar nengah tali arus tu laban nadai internet ti manah, kelimpah ari penanggul sekula repuk enggau perengkaguna ba sekula ti enda chukup.

“Agi mayuh sekula ba menua ulu enda ulih dikangau ngena servis telefon lalu nadai internet.

“Pekara tu chukup nyinuka ati kitai baka ke suah dipeda kitai ba sebengkah media rama.

“Internet ba endur nya chukup jai nyentukka nembiak begempuru berimbai enggau kampung, ketegal deka nitihka pengawa pelajar aja,” ku iya madah.

Ba pesan taun baru nya, Willie enggau Elias bela mantaika jaku terima kasih ngagai Perintah Sarawak ti udah ngemeratka pengelantang enggau pengerai rayat Sarawak kelebih agi nengah pengawa enda ngatur pengawa bepilih nengeri (PRN) ke taun tu.

“Lebuh kitai mansang ngagai taun 2021 lalu ninggalka taun 2020, kitai mesti nyimpulka taun tu enggau penuh pengarap ngambika ulih ngetanka pengawa kitai ngemansangka menua,” ku iya.

Suara Sarawak