KUCHING: Opis Menteri Dagang Temuai, Seni enggau Main Asal ngarapka belanja ti deka dibantai 11 Oktober tu deka tetangkupka peminta enggau guna opis menteri nya.
Menteri iya, Datuk Abdul Karim Rahman Hamzah madahka agih belanja nya beguna amat dikena ngemujurka pengawa kelebih agi ngelakuka dagang temuai menua tu.
Taja pia ku iya, sida deka nganti dataika belanja nya dibantai Hari Lima minggu baru ba Dewan Rayat.
“Baka nengeri bukai mega, kami ngarapka belanja ke deka dibantai nya ulih nangkup peminta ngerumban pemansang infrastruktur enggau pengawa ngelakuka dagang temuai Sarawak.
“Kitai engka dipegai perintah ke bebida, tang enti ngaul pengawa ngelakuka dagang temuai, aku ngarapka Perintah Besai ulih meda pekara nya ari sukut positif sereta enda dibalut politik,” ku iya andal.
Abdul Karim madah munyi nya pengudah nyuaka Pata Gold Award ngagai Opis Dagang Temuai Sarawak (STB) ba Ringkat 7, Begunan Baitulmakmur ditu, kemari.
