Arap penanggul diputar manah – Motac

KUCHING: Pengawa mutuska pengerekai pandemik Covid-19 mesti dipejalai enggau manah sereta enda meri penanggul ngagai industri dagang temuai menua, ku Menteri Dagang Temuai, Seni enggau Main Asal (Motac), Datuk Seri Nancy Shukri.

Ku iya, penerang Ketuai Direktor Opis Pengerai Tan Sri Dr. Noor Hisham Abdullah bekaul pejalai mindah entara pelilih menua enggau nengeri deka diperundingka enti 70 ngagai 80 peratus rayat udah divaksin Covid-19 apin lama dipelaba deka meri pangka ngagai industri dagang temuai dalam menua.

“Aku bebasaka penau enggau penemu iya dalam nagang pengerakai penyakit nya tang aku irauka penerang nya ulih meri pangka balat ngagai industri dagang temuai dalam menua ti udah setaun balat tejanggal.

“Aku bejaku ukai semina pasal pangka ekonomi menua, tang aku mega ngerunding pasal periuk asi enggau pejalai pengidup pemain industri menua,” ku iya nengah sebengkah penerang media, kemari.

Tandu iya ti mega Kaban Parlimen Batang Sadong, industri dagang temuai bekaul rat enggau pejalai mensia ari sesebangkah palan ngagai palan ti bukai.

“Enti nadai pejalai, reti iya nadai dagang temuai enggau mega aktiviti ekonomi, tu ngujungka nadai pengereja pengawa enggau penatai pemisi bagi sida ti gawa dalam industri tu.

“Nya alai, aku ngarapka perintah ulih mutarka penanggul ti adil ungkup pengelantang pengerai enggau ekonomi rayat sereta mikir chara ngemendarka semua pejalai domestik nyengkaum muka atur ngerentas nengeri,” ku iya.

Berebak enggau nya, iya pechaya mesti bisi siti chara baru dikena nyekat pengerekai penyakit Covid-19 kelimpah ari neruska atur nyekat ngerentas nengeri.

Ku iya, kitai patut menang dalam mutarka penanggul tu sereta menang mega ngidupka ekonomi menua kelebih agi industri dagang temuai.
Tandu iya, MOTAC deka besedia meri kerejasama ngagai semua raban ngulihka chara ti pemadu manah.

Ketuai Direktor Pengerai Tan Sri Noor Hisham Abdullah, Hari Lima tu tadi madahka, pengawa muka garis entara pelilih menua enggau nengeri nyangka deka diperundingka enti 70 ngagai 80 peratus rayat udah diberi vaksin Covid-19.

Ku iya, maya diatu, Opis Menteri Pengerai (KKM) bedau berunding ngemendarka pengawa ngerentas pelilih menua enggau nengeri taja program vaksin udah berengkah.

Suara Sarawak