KUCHING: Bajet Sarawak 2024 ti deka dibantai sehari tu dikeandal ulih mandangka pengeransing Perintah Sarawak ngemansang penuh nengeri enggau rayat diri.
Sapit Menteri Utiliti enggau Telekomunikasyen (Utiliti), Datuk Dr Abdul Rahman Junaidi madah, besai pengandal ati ngambi bajet nya ulih ngamat juluk kitai.
“Ba Bajet Sarawak 2024 tu, juluk aku deka meda pelasar ti mungkur semua sereta ngasi agi dikena nyukung pemansang rayat.
“Kitai deka meda agih belanja ti diberi ulih meri empas terus ngagai pengelantang penuh rayat Sarawak,” ku iya lebuh dirandau Suara Sarawak.
Iya madah, entara pengandal ati kitai baka pengawa bejalaika inisiatif strategik ngemanahka agi bungkur enggau kualiti pelajar kelebih agi ungkup rebak biak ti nyadi reta nengeri dudi hari.
Nengah pengawa ngemerat pemansang modal mensia, rebak biak Sarawak ulih ditempa ari sukut pengelandik ngambi ulih besemekih ba ekonomi dunya.
“Kitai sedar pengawa nyukung pelajar tinggi sereta beranakka puku ba pekara mansik enggau pemansang beguna amat dikena nempa ekosistem inovasyen ti ulih nyungkak pemansang.
“Nya alai, aku ngarap pelasar ngagih bajet ti proaktif beguna amat dikena nyapai juluk tu,” ku iya.
Iya mega ngarap bajet sekali tu bela ngemerat pelasar ti mungkur semua enggau ngasi agi dikena nyukung raban ti ngembuan penatai pemisi baruh sereta inisiatif betampung dikena nambah penatai pemisi ruang bilik.
“Raban ti ngembuan penatai pemisi baruh enggau pedagang mit patut diberi perati khas sereta enda dikelaung.
“Sukung ti besai agi ungkup bala pedagang mit patut dikemerat. Besai pengandal ati kitai ngambi bemacham insentif ulih diberi dikena nyungkak pemansang ekonomi bala pedagang mit,” ku iya.
