Arap servis bank datai ke Pelilih Mit Debak

DEBAK: “Aku endang ngarapka bisi servis bank mindah kin kitu ba Pelilih Mit Debak kelebih agi maya hari besai laban aku dekaka peranak ditu lantang ati,” ku Kaban Kunsil Nengeri (Adun) Saribas Mohammad Razi Sitam.

Razi nerima manah inisiatif Perintah Sarawak di baruh Bantu Khas Sarawakku Sayang (BKSS) 3.0 ti nyendiaka servis bank mindah kin kitu enggau ATM ba kandang menua pesisir.

“Aku ngasaika Perintah Sarawak udah ngaga pemutus ti engkeman ngambi ngemuntangka pengawa peranak ba menua pesisir.

“Kebuah pia laban taja bisi bantu ari perintah tang sida enda ulih ngambi duit nya beretika pengawa tu enda ulih mantu sida.

“Nya kebuah, aku ngarap enggau minta piak bank deka beoperasyen ba Pelilih Mit Debak kelebih agi maya Hari Raya Aidilfitri enggau Gawai Dayak,” ku iya madah ngagai Suara Sarawak.

Mohamad Razi Sitam.

Ku Razi, servis nya deka ngasuh peranak ba Pelilih Mit Debak tu lantang laban sida endang ngarapka bisi servis ke semak endur ngambi duit.

“Kitai meretika penusah diasaika rayat berindik ari penerit Atur Tagang Pejalai Besyarat (PKPB) tu.

“Nya alai, aku ngarapka pelilih mit Debak tu enda dikelaung enggau aku meri besai terima kasih ngagai Kepala Menteri Datuk Patinggi Abang Johari Tun Openg laban udah ngagihka belanja ngambi ngemujurka inisiatif nya,” tandu iya.

Taja pia, Razi agi ngarapka piak Bank Negara Malaysia (BNM) enggau bak bukai ngambi ulih nyendiaka servis bank ba sitak nya lalu pekara tu suah dibantai enggau dipinta.

Kena Hari Lima tu tadi, nengah BKSS 3.0, Abang Johari madahka Perintah Sarawak ngagihka belanja RM400,000 nyadika belanja puku ngagai Bank Simpanan Nasional (BSN) ngambi nyendiaka servis bank mindah kin kitu ngagai komuniti ba menua pesisir.

Ungkup ngepunka inisiatif tu, kaunter servis BSN udah beoperasyen ba Pakan kenyau 10 Mei nyentuk kemari sebedau servis nya dikerembai ngagai sitak bukai.

Rayat ti napi pemar ngulihka servis bank tu madahka diri berasai lantang enggau nerima manah inisiatif tu.