Arap tang enda kelalu andal

Finalis ACSJ Ke-6 : D’Crystal enggau Joseph Dresa

INFO
Penanyi enti nadai peminat nadai penyadi lalu peminat enti nadai penanyi pan timpang kediri.

Idup kitai sama begunaka pangan diri. Kitai enda ulih idup kediri diau nengali. Penanyi enti nadai peminat pan nadai penyadi lalu peminat enti nadai penanyi pan timpang kediri.

Kaul enggau pangan diri chukup beguna ba enda milih nama bagi pengawa tauka aktiviti. Reti nya dalam idup mesti bisi sukung, peminta enggau timbal. Ba kontek barang dagang dikumbai kitai ‘bisi peminta enggau pengawa ngeluar’.

Betemu baru ba ruang pemerindang finalis Anugerah Carta Sapa Juara (ACSJ) ti ke-6. Minggu tu kitai bekunsika berita enggau cherita ari dua iku finalis, Joseph Dresa enggau D’Crystal.

Joseph Dresa bentaruhka lagu hits iya Ganti Ti Menyana lalu band D’Crystal Kemayang Nuan. Lagu Kemayang Nuan mega udah kala nyadi champion ba Charta Lagu Tebilang Cats (LTC).

Band D’ Crystal

Band D’Crystal

Band D’ Crystal ditumbuhka dalam taun 2014 enggau tujuh iku raban. Enam iku sida asal ari Sibu lalu siku ari Kuching. Ari taun 2014 nyentuk ngagai 2019 udah mujur ngeluarka tiga iti album kediri.

Album kediri Kemayang Nuan udah mujurr ngangkatka nama sida nyadi champion charta ba CSJ Waifm enggau LTC Catsfm. Nangkan Kemayang Nuan, D Crystal ngeluarka dua album kediri baru diberi nama ‘Jera Aku’ enggau ‘Nadai Reti Agi’. Album kediri nya tadi digaga Maxwell Taju Remaong enggau Tony Engkabi.

Bepangai ba pemujur tiga iti album kediri, D’ Crystal bisi perambu deka ngaga album penuh. “Udah datai maya kami sebuat ngeluarka album penuh.

Pemutus ngaga album penuh ti dijangka taun 2020 nyin ila mega datai ari peminat kami. Diatu kami benung ngumpul lagu ti engkeman enggau konsep muzik kami. Enda tentu mudah ngaga lagu baka Kemayang Nuan”, ku Harry ke nyadi vokalis.

D’ Crystal band mega sebaka enggau artis bukai, bisi idol kediri. Sida bulih penemu enggau peransang ari band Masterpiece enggau Taju Remaong.

Ditanya naka ni sida udah nyendiaka diri ba ACSJ 6 tu, Harry madahka sida udah berunding pasal langkar gaya pemerindang maya final ACSJ tu ila.

“Utai ke pemadu beguna diatu kami sebuat gerai sereta lantang. Baka finalis bukai, kami mega merambu mandangka gaya pemerindang kami lebih nyelai ari maya kami belagu ngelama tu.

“Taja pan pia pekara nya semina genera ari kami sebuat. Aku pechara finalis bukai mega sebaka tauka lebih ari kami,” ku Harry.

Harry mega madahka sida udah chukup puas udah ulih enggau masuk final. Ba enam kategori ti dipekit, D’Crystal nadai madah bagi kategori ti gerinti ulih diempu sida. Kebuah pia ku iya laban nasit finalis malam nya ditentuka hakim enggau juri ke lebih nemu pasal pekara nya.

“Terima kasih semua peminat kami, komposer sereta enggau kami sebilik ti enda kala leju meransang sereta meri sukung. Terima kasih mega dj radio, kaban facebook enggau raban pemberita”, ku Harry ngujungka randau.

Joseph Dresa

Joseph Dresa

Joseph Dresa ukai orang baru ba ACSJ. Kebuah pia laban iya udah kala enggau nyadi finalis ACSJ – 5 bepadu nyawa enggau Jocey Menti enggau lagu Pangan Entara Menua ti diatur di Betong 2018 suba.

Ba ACSJ-6 tu Joseph Dresa deka mai lagu Ganti Ti Menyana. “Aku berasai temegah laban udah ulih enggau masuk final.

Tusah amat deka madahka peluang diri laban finalis bukai bela badas enggau kualiti diri empu. Ba aku alah menang adat pekit. Utai ke lebih beguna nya kaul enggau pangan diri.

Anugerah ke besai baka tu ukai kelalu endur kitai berebut sapa ke menang tang kaul enggau pangan diri mesti dijaga,” ku Joseph Dresa.

Peminat nentuka pemujur penanyi. Lagu ti badas enti nadai peminat pan tau nadai tunga.

“Ba aku, peminat lagu Iban udah chukup mereti. Kelimpah meri sukung ti patut, sida mega nemu milih lagu ti engkeman ba ati sida enggau lagu ti badas didinga semua.

Ba pekara tu peminat mih ti nentuka pemujur artis enggau lagu iya.

Enggau tu aku meri besai terima kasih ngagai semua kita. Peminat nyadi tiang enggau sukung bala penanyi, “ku Joseph Dresa madahka diri bisi pengarap tang enggai kelalu andal.

Ditanya sentang peluang menang ba ACSJ-6 tu, Joseph Dresa madahka diri enda berani nyaut tanya nya laban semina akim enggau juri aja nemu nasit tiap iku finalis.

Taja pia ku iya, iya nguji enggau naka ulih lalu alah menang sigi mar dijangka. Iya ke lebih beguna nya kaul enggau bulih peneleba.

Kitai sama arapka D’ Crystal enggau Joseph Dresa bela mujur ba ACSJ-6 tu ila. Arap peminat terus nyukung sereta besampika pemujur sida.

Amat munyi ku rambai jaku, Meraka Tasik Nengkilah Remang, ACSJ ukai semina ngangkatka nama enggau rita lagu enggsu muzik Iban tang iya mega ulih nyadi pelasar endur nanggam kaul ti badas enggau pangan diri.

Tabi puji DJ Monica enggau raban iya ba Anugerah Charta Sapa Juara (ACSJ) -6 tu. Arap anugerah tu terus ditampung sereta diatur majak badas ninting taun.