Arap vaksin covid-19 jampat datai – Karim

SIBU: Menteri Dagang Temuai, Seni enggau Main Asal, Datuk Abdul Karim Rahman Hamzah ngarapka vaksin Covid-19 jampat datai ungkup rayat ba menua tu.

Ku iya, pandemik tu udah ngeruga pengidup rayat enggau industri ba menua tu.

“Berapa hari tu, kitai suah ninga mayuh vaksin udah ditemu lalu kitai arapka vaksin nya jampat datai ngagai kitai.

“Aku ngarapka pengudah vaksin datai ditu, nengeri enggau menua tu deka lepas ari igi penyakit nya lalu pengidup kitai deka pulai baka selama.

“Aku andalka vaksin tu deka datai ditu berapa bulan agi,” terang Karim.

Karim mansutka jaku nya rambau Program Pemerindang ‘Saturday Night Fever The Musical’ enggau Pengerami Makai Lemai Ngenang Jasa Raban Gawa Ba Luan Bagi Menua Sibu ba sebuah hotel tebilang, malam kemari.

Bejaku pasal ‘Saturday Night Fever The Musical’, iya deka mai program nya ngagai bagi menua bukai kelai ngenang jasa semua raban gawa ba luan.

Iya madahka muzikal nya deka meri penyedar ngagai mensia mayuh kelebih agi raban gawa ba luan pasal nyau deka setaun kitai udah ngelaban Covid-19 tu.

“Orkestra Simfoni Nengeri Sarawak udah merindang ungkup raban gawa ba luan di Kuching lalu diatu kitai mai sida ke Sibu.

“Kami naka ulih mai sida ngagai bagi menua bukai laban nya chara kami ngenang jasa sida ti udah bebendar gawa ngelama tu,” ku Karim nerang.

Karim madahka rayat berutang budi ngagai raban gawa ba luan ti udah bebendar gawa ngelaban Covid-19.
Ku iya, kitai seruran ngenang jasa bala raban gawa ba luan ngelama tu.

Iya mega meri besai terima kasih ngagai mensia mayuh ti udah meri kerejasama nagang pengerekai Covid-19 lebuh nitihka Atur Pengawa Standard (SOP).

Sama datai bini Karim, Datin Zuraini Abdul Jabbar, Menteri Muda Dagang Temuai, Seni enggau Main Asal, Datuk Sebastian Ting Chiew Yew, Sekretari Mendam Opis Menteri Dagang Temuai, Seni enggau Main Asal, Hii Chang Kee, Ketuai Pemesai Eksekutif Kaunsil Seni Sarawak Sharkawi Amit enggau Residen Bagi Menua Sibu Charles Siaw.

Suara Sarawak