KUCHING: Penyarut politik ba Malaysia udah majak manah, pia ku Datuk Abdul Karim Rahman Hamzah.
Menteri Dagang Temuai, Seni enggau Main Asal nya madah, sida berasai lantang ati laban pejalai politik makin manah.
“Kitai nyukung pengawa nyiri Tan Sri Muhyiddin Yassin nyadi Menteri Besai kelapan seriris enggau sukung diberi Kepala Menteri ti mega Chairman GPS Datuk Patinggi Abang Johari Tun Openg ba pemutus digaga Seri Paduka Baginda Yang di-Pertuan Agong Al-Sultan Abdullah Ri’ayatuddin Al-Mustafa Billah Shah,” ku Karim.
Iya mansutka jaku nya ba sebengkah penerang di Facebook iya empu (YB Karim Hamzah), ditu kemari.
Nambahka nya ku iya, sida mega nyukung Muhyiddin siku ketuai ti ngembuan integrity laban iya nya raban politik veteran, ex- Menteri Pelajar enggau mangku beberapa portfolio dalam kabinet.
“Pejalai politik enggau mangku mayuh pengawa ba kabinet nunjukka iya tu siku orang ti mayuh peneleba.
“Arapka semua kitai besampi ngambika iya gerai enggau lantang sereta pintar milih raban kabinet ngambi ulih ngemansangka menua Malaysia tu,” terang iya.
Berebak enggau nya, iya ngarapka Menteri Besai ke baru tu deka nyapai juluk enggau hak rayat Sarawak kelimpah mantu menua Sarawak nitihka pematut.
Dulu ari nya, Seri Paduka Baginda udah nyiri Muhyiddin nyadi Menteri Besai seriris enggau Perkara 40(2)(a) dan Perkara 43(2)(a) Perlembagaan Persekutuan.
