Argentina ngulit tiga hari, basa ngagai Maradona

ARGENTINA: Argentina ngulit tiga hari dikena meri basa ke pemidang pemain bol tebilang menua nya, Diego Maradona ketegal sakit jantung kira dini hari pagi tadi.

Presiden Argentina, Alberto Fernandez ngenukuka pekara nya lebuh dirandau enggau surat kabar (Clarin) madahka iya berasai puang ditinggal ex-Kapten Argentina nya.

“Aku berasai sinu enggau agi enda ulih nerima berita sinu tu. Nya mih berita pemadu sinu ngagai peminat Argentina.
“Kami sayauka iya lalu aku nguji telefon ngagai sida sebilik,” ku Fernandez.

Maradona ke beumur 60 taun diripotka mutus seput ba rumah iya empu di Buenos Aires.

Niang tu diaku nya siku ari pemain pemadu landik dalam sejarah, nyadi kapten lebuh Argentina menang Piala Dunya 1986 enggau mandangka chara bemain pemadu manah.

LENYAU LAGENDA MAIN BOL… Siku peminat nungkun dian kelai basa kepenudi ngagai niang Maradona.

 

Digelar ‘Hand Of God’, niang mega kala bemain ngarika Kelab Barcelona enggau Napoli lebuh agi biak kelimpah menang dua gelar Serie A begulai enggau tim iya ba Itali.

Sebedau tu, niang diripotka bisi beputung ngeluarka darah meku dalam untak, kena pun bulan November tu tadi.
Kelimpah ari nya, iya mega kala berubat ketegal gian ngirup ai bisa.

Nitihka penerang media entarabansa, rumah Presiden nya, Casa Rosada deka disedia ungkup sida Maradona sebilik ngatur pengawa numbak ke niang nunda chara menua nya.

Sebedau tu, tujuh presiden menua kala diberi basa kepenudi nitihka chara numbak ba menua nya.

Tu nyengkaum Bartolomé Miter, Manuel Quintana, Carlos Pellegrini, Roque Sáenz Peña, Julio Argentino Roca, Marcelo Torcuato de Alvear enggau apin lama Néstor Kirchner (2010).