Ari Aka Dambai nyadi Tanah Berenyang

Juluk ati deka meda lagu ke ditengkebang pegari nama sereta ulih besemekih enggau lagu bansa bukai ba renggat ke lebih tinggi, ku Jesley Jabu anak Bajang, 46 taun.

Jesley asal ari Rumah Munan,Ensawang,Lubok Antu, anak lumur dua ari tiga iku diri menyadi siku ari raban band Rock Iban ke diberi nama Tanah Berenyang ditumbuh ba taun 2017.

Jarang peminat lagu Iban enda ngelala tauka enda nemu nama iya laban ke seruran nengkebang lagu ungkup bala penanyi bukai. Kelimpah ari landik ngaga leka lagu, Jesley mega landik nusun tiun lagi kelimpah nyeruri video ungkup sesebengkah album.

Leka lagu ke ditengkebang Jesley udah mujur ngangkatka nama sekeda penanyi biak baka Shasha Julian, Karen Libau, Eyqa Saiful, Charlene Johnny, Alexander Peter enggau Raban Rajai.

Kelimpah ari nya, Jesley mega bisi ngaga lagu ungkup penanyi bukai baka Aki Manang,Stevenson,Linda,Jeniffer Jack,Julita James,Sima, LeeZwita, Jessica Remaya, Eisner Nala, Rymuse Bilong, Firdaus Udin enggau ke bukai.

Raban Tanah Berenyang

Berebak enggau nya, menyadi aku empu Mathhius Mambang pan suah minta digagaka aku lagi kenyau ari taun 2001.

“Mayuh mega raban band bukai selampur Sarawak enggau artis ngati diri mega bisi begunaka lagu ditengkebang aku,”ku Jesley.

Band Tanah Berenyang

Apai ngagai dua iku anak tu, siku ari pemungkal siti band rock Iban ke diberi nama Aka Dambai (2001) kala tebilang enggau Album Ngeransi ti ngundan lagu hit baka Ngeransi, Iban Tracker Sarawak Ranger enggau Auni.

Udah nya, sida ngiga angin baru ketegal ti betukar raban ngujungka nama band Aka Dambai ditukar ngagai Tanah Berenyang ba taun 2017 nyentuk ke sehari tu,” ku iya maya dirandau Suara Sarawak.

Band Tanah Berenyang tu diarika Ulin anak Empit tauka dikangau Ulin Dom nyadi vocalist, Steve Macqueen Morgan nyadi Drummer, Mark Hazel Harry (Jumpbull Murdoc) bemain gitar enggau Jesley bemain bass ke mega kapten Tanah Berenyang.

LAGU BARU…Raban Tanah Berenyang benung nyadaka lagu Sulu Peraja Mata enggau Chelak Tiru apin lama.

Dom Ulin, beumur 40 taun asal ari menua Titok Ulu, Engkilili ngembuan patah nyawa ke chukup kering, terang didinga sereta engkeman enggau sebarang lagu ke mai vokal ti tinggi.

Ungkup penemu mega, niang apai Dom maya ke agi idup suba endang siku orang ke landik nimang sereta pandai beramban.

Nyadi enda iran kitai dinga sada nyawa Dom chukup manah didinga.

“Taja umur Tanah Berenyang ‘agi puda’ dalam industri pemerindang tang kaban band tu semua orang ke mayuh peneleba ba pengawa merindang.

“Diatu kami mujur ngaga dua iti lagu enggau video dikumbai Sulu Peraja Mata enggau Chelak Tiru sebedau penanggul pengerekai igi penyakit Covid 19 tu tadi,”ku iya.

PENGINGAT…Maya begulai enggau Azlan TypeWritter maya Showcase penanyi nya ba Riverview Station Cafe & Bistro 2019.

XPDC Iban

Band Tanah Berenyang tau dikumbai XPDC Iban laban enda sesalah baka siti band rock tebilang ba Semenanjung iya nya XPDC ti ngayanka imej bebuk panjai.

Pia mega genre musik dibai pan sebaka enggau XPDC iya nya Heavy Metal, Hard Rock enggau Slow Rock ba genap lagu ke dimain sida.

Lebuh ditanya bakani sida sebuat ulih begulai lama enggau pangan diri dalam Tanah Berenyang Jesley madah,nadai tentu tak bangat bisi petua tauka atur ti nyengenda dikena kelimpah ari selalu berandau manah enggau pangan diri nyema bisi penanggul nuntung.

“Nadai penanggul enda alah diputar enti kitai berunding sereta berandau betungga mua enggau manah.

“Pengawa baka tu endang udah nyadika peneleba ba raban Tanah Berenyang enda milih nya penanggul batang tubuh diri empu tauka besangkut paut enggau raban tu empu.

“Semua nya endang meseti deka dikerandau sereta diputar enggau lengkas,”ku iya ti udah lebih 20 taun ngembuan peneleba dalam dunya pemerindang Iban.

Jesley mega bekunsi penemu ngagai pemberita sentang chara ngintu tauka nyaga buk ti panjai.

“Mayuh orang ba luar dedin salah anggap nuju orang ti ngembuan buk panjai, lebih agi enti orang nya lelaki.

“Taja kami siti ari raban ti angkunka genre musik rock, tang kami mega enda sebarang dalam ngintu pemeresi batang tubuh diri empu.

“Baka sida ke indu ti nganggap buk tu ‘lambang’ pemajik sida iya, pia mega kami ti begunaka buk panjai dikena mandangka konsep rock ti dibai kami lebuh maya merindang.

“Ukai enggai enda bebuk panjai lalu baru tau dikumbai ‘rockers’, tang gaya pemerindang ti bebuk panjai endang udah nyadika identiti rock kenyau ari kelia lalu gaya tu ba aku mesti ditan,” ku iya.

Dalam dunya pemerindang tu mayuh jaku peransang diterima ari bala peminat, bala bakih kelimpah ari diri sebilik kenyau ari hari keterubah nujah dunya pemerindang.

“Aku ngarapka bala raban artis ti bukai sama bela besaup enggau pangan diri dalam ngemaju tauka ngemansangka industri musik Dayak Iban ngambi majak dikelala ba serata menua.

“Sapa aja ti bisi buah penemu ti engkeman, nadai salah madah, ngerara sereta bebagi enggau pangan diri lebih agi ungkup artis ke biak-biak.

“Tu betuju awakka kitai sama ulih nyingkang ke mua sereta teulihka pemujur dalam nyapai juluk ati diri.

“Iya ka ba baruh ditarit lalu iya ka tinggal meseti dianti,”ku iya seraya besampika pemujur semua artis Dayak dalam dunya pemerindang.

Ungkup penemu mega, enda lama agi kitai di Sarawak deka bisi stesyen televisyen kediri dikumbai TV Sarawak nyadi ngarapka nengah perambu manah ari perintah nengeri tu ulih muka peluang lebih agi ngagai pengemeran industir muzik Dayak Iban regas agi ngambi bagi, nyikap diri bepun ari diatu dikena nangkup peluang ke bisi disedia piak stesyen TV Sarawak udah tu ila.

Suara Sarawak