Ari dagang kerepek, mujur muka kilang

KUCHING: Bepun muka dagang nyual kerepek Iskandar Mohd Ali diatu mujur ngempu sebuah kilang mit di Balingian, Mukah.

Lelaki bebansa Melanau tu madah diatu iya benung chakah deka ngerembaika dagang ngaga kerupuk ikan, nyual umai, tumpik enggau ngaga servis katering.

“Suba aku semina bedagang mit laban Balingian pelilih ti enda besai entara Bintulu enggau Mukah.

“Mujur bisi bantu ari Opis Betanam Betupi, ejensi perintah enggau mensia mayuh diatu aku bisi kilang mit din,” ku iya.

Iskandar bejaku munyi nya lebuh ditanya Suara Sarawak maya ngulu Agrofest Sarawak di Stadium Nengeri Sarawak ditu, kemari.

Ku iya, kilang mit iya diatu ulih ngeluarka urung 300 ngagai 500 paket kerupu enggau kerepek sehari.

“Maya bepun bedagang suba aku napi penanggul nyual produk kelimpah tusah ngulihka barang mata.

“Baka pisang, buah jabang enggau ikan kadang-kadang enda chukup nyengkaum tusah ngulihka minyak makai enggau tepung kelebih agi lebuh musim pengerami.

“Nya alai, aku ngiga jalai bukai mutar penanggul tu nanam jabang enggau pisang kediri dikena nangkup peminta makit,” ku iya nusi.

Tandu Iskandar dalam sebulan iya ulih ngulihka penatai kasar urung RM18,000 lalu angka tu belipat maya musim pengerami.

Bekaul enggau Agrofest Sarawak sekali tu, Iskandar madah iya nyual umai enggau tumpik pemakai asal bansa Melanau di Mukah.

“Umai bisi dua bansa, siti umai champur lalu siti agi umai ulam ke alai kuah kediri.

“Bansa Melanau di Mukah ngiga ikan enggau asil tasik nyadi pun penatai pemisi nya alai umai din tebilang.

“Pia mega, tumpik tu digaga ari tepung sagu begulai enggau nyiur sereta ditambah aku undang awakka asai iya nyamai,” ku iya.

Kenu ku iya, maya bejual dua hari ti udah iya enggau bini nadai chukup jari napi peminta pemeli laban orang rindu nyepi umai digaga bansa Melanau empu.

“Aku arapka, dagang aku terus ngerembai sereta maju. Enti ulih, ngarapka dagang aku ulih keluar ari Sarawak nuju makit luar,” ku iya.