Ari penemu ngaga tanggu landik ngaga bemacham kraf jari

KUCHING: Bepun belajar asil pengelandik jari ngaga tanggu Josephine Tanggie, 36 taun diatu landik begagaka mayuh macham asil pengelandik jari ke bukai baka marik, selampai ngias dinding, kain tating, selapuk pala, sirat enggau ngait selampai.

Diau ba Saeh, Batu Niah, Josephine madahka pengelandik jari ti digaga iya mega bechampur tradisional enggau moden.

“Aku ngaga tanggu tradisional enggau moden, marik lama enggau marik marimar, pengias dinding ari marik enggau ke bukai.

“Semua pengelandik jari tu dipelajar aku ari ibuk aku empu enggau ari gambar ti ayan ba facebook laban minat aku ngagai keresa asal besai,” ku iya lebuh dirandau Suara Sarawak, kemari.

Josephine madahka diri ngena ungkus ti besai lebuh belajar ngaga semua pengelandik jari iya.

Josephine Tanggie, 36 taun landik begaga mayuh macham asil pengelandik jari.

“Aku puas belajar, enti salah aku deka mungkal ngaga baru nyentukka aku ulih ngaga.

“Ba ati aku empu madah, enti orang bukai ulih ngaga, enda patut aku enda ulih.

“Ungkus dikena aku nguji belajar enda dikira laban aku sigi endang minat meda asil pengelandik jari aku tembu,” ku iya.

Kelimpah ari nya, iya madahka pengawa ngaga asil pengelandik jari tu semina pengawa maya bisi awak aja.

“Enti bisi peminta baru aku ngaga, kekadang aku ngaga ke kami sebilik aja dikena ngias rumah aku empu.

MANAH…Entara proses asil kraf jari ke udah digaga Josephine.

“Sekeda ari asil pengelandik jari ti digaga aku enti bisi lebih dijual, tang tebal agi orang ngudar ngagai aku.

“Enti baka tanggu dalam seminggu ke dua minggu tembu meda gaya ukir enggau buah ti dikedeka pemeli tang, enti ngait selampai kira sebulan baru tembu,” ku iya.

Ku Josephine, selampai ti dikait iya bebida pemanjai entara 2 meter ngagai 4 meter.

“Laban tu pengawa aku maya lepa aja pemayuh dijual enda tentu, kekadang mayuh kekadang enda, penyampau asil dijual endang bisi dikena nambah penatai pemisi kami sebilik.

“Pemar ditapi aku lebuh ngaga asil pengelandik jari tu iya nya, lebuh pemeli ngisil udar maya pengelandik jari nya udah tembu.

MANAH…Entara proses asil kraf jari ke udah digaga Josephine.

“Chunto, lebuh pemeli ngudar tanggu, udah tanggu tembu sida lalu enda nyadi meli, nya ti ngasuh aku puas ngiga orang bukai ti sanggup meli,” ku iya.

Iya madahka, pementas sereta ati ti lurus lebuh ngaga asil pengelandik jari mesti dikembuan ngambika terus dikerindu pemeli.

“Enti pemeli puas ati, aku endang berasai gaga laban nya nandaka asil kereja aku manah.

“Pia mega, lebuh ngeletak rega siti-siti asil pengelandik jari kitai mesti meri ba rega ti patut,” ku iya.

Josephine madahka, asil pengelandik iya tebal agi dibeli bala pengajar, orang rumah panjai, orang di Saeh, Miri enggau Batu Niah.

“Aku ngarapka diri ulih nyadi kaban Kraftangan Sarawak awakka aku ulih bejual asil pengelandik jari lebuh maya bisi pengerami.

“Pia mega, ngarapka aku ulih maju dalam dagang tu taja enda besai.

“Ngagai bala nembiak rebak baru anang enggai belajar asil pengelandik jari awakka pengawa tu enda punas,” ku iya.

Barang sapa deka ngudar asil pengelandik jari ari Josephine, kita tau ngelawa facebook iya benama Lea Memey.

Suara Sarawak