SAPA nyangka pejalai siku pengarang novel Iban tebilang, Jerryson Chua tau rembus lalu tepejuh ba dunya pemerindang Iban.

Ba dunya pemerindang, iya ngena nama Jerryson Cpyrian ti mai reti gerah jari, ngenatai berita manah enggau enda nyerah alah. Nya nama Kristian iya.

Nenggau pejalai iya ba dunya pemerindang, diatu iya mujur ngerikod enggau ngeluarka lagu baru diri ti pejuluk Ngeransi.

Lagu nya mujur dikeluarka kena 25 Julai tu tadi ba pelasar YouTube T&S Recording Studio lalu diatu udah bebali nyadi T&S Music Production.

Naka diatu, lagu nya mujur dipeda lebih 3,000 orang enggau nerima kelai like lebih 100 ari mensia mayuh.

RUNTUH SEBUAH MELIGAI
Lebuh dirandau lenak agi senentang lagu Ngeransi, Jerryson madah, lagu nya ngenang sebuah meligai ti didirika ngena semin pengerindu diatu udah runtuh ketegal orang ketiga.

Tak sinu gaya mua iya nusui senentang lagu nya sambil nyintak seput dalam enda nyalah baka ti bisi pekara berat nuntung pengidup iya.

Pengudah seput dikesuh, iya madah, lagu nya ngundan litan ti dalam sereta balat mangka pengidup iya.

“Chukup berat ati ngenang pekara ti udah nyadi laban nya ukai utai ti dipinta tang nyangka nya penguji ti ngasuh ati udu berai.

“Andal meh anak ati deka mujur nirika meligai ti entap baka orang bukai. Enda nyangka perau ditepan aku karam dipangka bebuli nyadi.

“Besai amat penguji ditapi aku nyentuk enda ulih ditanggung kediri nengali hari. Enti udah nadai chara nadai daya, pandak meh jaku aku ka pen enda milih jalai beserara.

“Nyamai agi mai jalai diri empu ari pengerindu serepan bejanga dua dikunsi enggau orang bukai.

“Kempang amat nuan ambai, nempayaka pengerindu tua baka ti ngesai tikai, ditempaya enda diguna.

“Suah aku betanya nama penyalah aku? Nama pengurang penimpang aku? Nyentuk nuan asi kempang ati ngasuh pengerindu tuchi disimpul mati retai pechah bederai.

“Enda! Enda aku ulih nerima pekara ti nyadi chukup berat ti ngeruntun tangkai ati,” ku tusui Jerryson.

Peda tak belai mata iya lebuh nusui pekara ti nyadi ba taun 2018 suba nyangka telih lama agi menais meruan bepedi dalam ati.

IBUN MANAH RUANG BILIK DIRI
Iya madah, jalai cherita dalam lagu nya endang bekenangka peneleba ti kala diasaika iya lebuh nguji nirika ruang bilik diri tang enda nyangka semua nya anchur ketegal orang ketiga.

Nya alai, ku iya ngelalau, sida ti udah bisi ruang bilik, ibun sereta atur manah ruang bilik diri lalu anang nyalam tauka belalaika pekara ti nyadi enggau laki tauka bini diri.

Ingat meh danji deka idup mati sekunsi lebuh dua ati ditanggam ngena sempekat tuchi nyadi siti ati.

Laki bini patut tebuka enggau seati lebuh ngemudi sereta ngeluan perau ruang bilik diri nuju penyangkai.

Taja pen mayuh penguji datai silih beganti, tetap kering ke ati lalu anang sesekali alah ayu diumbuk jaku manis bemadu laban nya ulih ngerusak ruang bilik diri empu.

“Begulai ukai semina sehari dua tang nya nyentuk ke pengabis seput lela sulai. Emparu manah ruang bilik diri nyentuk pemati datai nyerara,” ku iya.

SINGKANG PEJALAI BA DUNYA PEMERINDANG
Taun 2022 nyadi siti taun ti mai reti ti besai sereta semampai dikeingatka Jerryson nyentuk ke ila laban nya meh keterubah iya ngepunka singkang diri ba dunya pemerindang Iban.

Pengudah iya tembu ngarang novel Atas Nama Pengerindu, dia iya lalu mantaika juluk diri ti udah lama diperam ba lubuk ati ngagai siku komposer ti mega penanyi tebilang, Tony Engkabi.

Nya alai, iya mantaika juluk diri deka ngerikod enggau ngeluarka lagu ngagai Tony lalu nya diterima manah.

Tony naka ulih mantu iya ngamatka juluk nya sereta ngansah penau belagu dikembuan iya enggau dalam agi.

Naka diatu, penanyi penakan China-Iban nya mujur ngeluarka dua lagu single diri ti pejuluk Ngibun Ati Nuan ba taun 2022 lalu pemadu baru iya nya Ngeransi.

Pejalai Jerryson ba pengawa merindang enda muntang. Iya suah napi bemacham penguji ti datai silih beganti nyentuk kala labuh teterap tetingkap.

Taja pia, ketegal minat ti besai enggau pengepuh ba pengawa merindang mujur mai iya berani nujah semua penguji nya.

Iya ukai orang ti jampat nyerah alah tang semampai liat ati napi semua penguji ngujung ke iya mujur beretan ba dunya pemerindang nyentuk sehari tu.

MINAT DIPARIT APAI INDAI
Minat Jerryson ba pengawa belagu nya sigi diparit apai seduai indai rambau iya agi mit suba.

Apai seduai indai suah nganjung iya masuk bemacham pekit belagu berengkah ari umur iya lapan taun.

Lebuh iya benung ngangkatka diri bujang urung beumur 18 taun, Jerryson berengkah belajar belagu enggau sada nyawa (vokal) ba gerija pengelama 11 taun.

Nambahka nya, iya suah enggau bala bakih iya ti mega artis lama merindang kin kia ba bemacham palan merindang.

Bisi sekali, lebuh iya beumur 25 taun, bala bakih iya meransang iya masuk pekit belagu ti bisi diatur maya nya kelimpah ngajar iya belagu rambau sida bejalaika pengawa merindang.

Nengah peneleba, pengelandik enggau pengandal ati ti dikembuan iya, Jerryson enggau ati berani nguji mantaika juluk diri ngagai Tony Engkabi.

DIGELAR ULAT BUP
Anak tuai ari tiga diri menyadi nya siku orang ti imun, pemalu sereta rindu amat macha bup nyentuk iya suah dikangau orang ‘ulat bup’.

Pia mega, lebuh bejalai mindah kin kia, Jerryson endang selalu bebaika bup ngambi bisi dibacha maya lepa.

Lebuh bisi penusut runding enggau penanggul ba pengidup, bemacham chara dikena kitai ngelantangka ati.

Nya baka pengawa mendingka lagu, lipak enggau bala bakih, raun ngelantangka ati, bebeli barang enggau ti bukai.

Tang nya jauh bebida enggau Jerryson. Iya deka macha bup lalu mantaika sebana diri nengah pengawa nulis dikena muai penusut runding enggau penanggul pengidup diri.

Ba kitai, pengawa macha bup nya meh pekara ti ngasuh kitai majak tusut runding.

Pandak jaku, bup endang udah nyadi sebagi ari pengidup penanyi ti nyadaka lagu Ngeransi nya.

CHUKUP KREATIF NGARANG NOVEL
Lengka ke dulu kenang kitai senentang pejalai iya ba dunya pemerindang, diatu kitai ngalih ngagai minat iya ngarang novel.

Ketegal ngembuan minat ti besai bekaul enggau bup, dia deh iya berengkah ngarang novel dalam jaku Iban.

Jerryson berengkah ngarang novel ba taun 2019 lalu naka diatu, iya mujur ngarang tiga novel dalam jaku Iban.

Nya nyengkaum novel Betacha, Ngerawai Neraka Tuai, Diantara Titi Rawan lalu pemadu baru iya nya Atas Nama Pengerindu.

Sebedau iya ngepunka pengawa ngarang novel, iya semina nulis enggau ngarang cherita ba sebelah media rama. Nya pen semina rindu ati aja.

“Aku berasai temegah laban mensia mayuh nerima manah asil keranjai jari aku nya sereta bela bekunsika nya ba sebelah media rama sida.

“Ari nya meh aku tebuka ati lalu ransing deka ngarang enggau ngeluarka novel lalu ditambahka minat aku ba pengawa tu.

“Nya alai, mayuh orang nadai nyangka aku ulih tepejuh ba dunya pemerindang nyengkaum aku empu laban tebal agi sida ngelala aku tu siku pengarang novel,” ku tusui iya.

RANSING NGANGKATKA JAKU IBAN
Bujang imun gaya nya madah, suba iya enda tentu landik bejaku Iban tang iya ngembuan minat sereta ransing deka belajar enggau ngangkatka jaku Iban.

Nya alai, iya ransing belajar enggau macha mayuh bup ba jaku Iban nyentuk mujur ngasilka sekeda novel ba jaku Iban.

Nusui juluk diri dudi hari, Jerryson madahka diri deka chakah ngangkatka jaku Iban ngambi majak dikelala ukai semina ba pengawa belagu tang nengah novel.

Pia mega, iya ransing nengkebang lagu bemacham rentak ungkup bala penanyi bukai ba baruh perabung T&S Music Production.

Nya nyengkaum lagu Meraka Tanah Tembawai ungkup penanyi Norman John, Anang Betanjah Jaku (Lyia), Ngelebus Langit Ketujuh (Donnie Edward) enggau mayuh agi penanyi bukai.

Ungkup penerang, ku iya, semua lagu nya deka dikeluar enda lama agi sereta ngarap peminat lagu Iban liat ati nganti.

INDUSTRI MUZIK IBAN MAJAK PEGARI
Lebuh dipinta ngelansa senentang industri muzik Iban, Jerryson madah, kitai betuah laban industri muzik Iban kemaya hari tu majak maju nitih singkang pejalai industri muzik menua bukai.

“Diatu mayuh bansa bukai minat enggau ngelala lagu Iban. Enti dipeda ba pelasar YouTube, lagu Iban mayuh trending ba penuduk keterubah.

“Tu endang siti pekara ti ngemegah kelimpah dipasuk mayuh penanyi baru bepenau ti bela ngerichahka agi industri muzik kitai.

“Nambahka nya, bala produser enda nyekat bala penanyi baru ngerembaika rentak lagu sida. Tu meh pekara dikedeka kitai,” terang Jerryson.

Tandu iya, begempung meh kitai bansa ngemajuka industri muzik Iban tu ngambi nempa penyulut kediri empu bepelasar ke chuan menua enggau pengelala bansa kitai.

ENTI UKAI KITA, SAPA MEH AKU?
Ngena peluang berega tu, penanyi sigat ti beumur 28 taun nya madahka diri beterima kasih ngagai semua orang ti semampai nyukung iya sekali ke ba pengawa merindang tauka ngarang novel.

Nya nyengkaum bala peminat, bakih, kaban belayan, sida sebilik, Tony Engkabi enggau semua raban T&S Music Production.

Jerryson meri besai terima kasih ngagai apai indai iya ti nyukung penuh pengawa iya ngarang novel enggau merindang.

“Berekat ari diparit, sampi enggau sukung seduai meh aku ulih nyapai tikas tu nitih dikedeka seduai ngelama tu.

“Ku ajar seduai, ‘enti udah mujur dudi hari, anang sesekali ninggika diri tang tetap ngemaruhka diri baruh agi ari rumput’.

“Ajar tu semampai dikeingat lalu nyadi tungkat pengingat aku nyentuk jemah ila.

“Aku chukup berutang budi ngagai kita semua. Sekali agi terima kasih ke sukung kita. Enti ukai sukung ari kita, aku sigi enda datai ba tikas baka ti diatu.

“Nya alai, aku besampi Tuhan merekatka kitai semua ngambi mujur ba semua pengawa dikereja genap kitai,” ku iya seraya tuchum manis mandangka diri chukup temegah.

Iya mega minta ampun nyema bisi pengilap enggau pengurang sereta besemaya deka nyelam dalam agi belajar ngarang novel enggau pengawa merindang.