KUCHING: Sistem Autonomous Rapid Transit (ART) renggat ti kedua deka digaga mansa Batu Kawa sebedau simpang nuju ke Bau enggau Lundu.
Kepala Menteri Datuk Patinggi Abang Johari Tun Openg madahka sitak Batu Kawa diatu udah majak sekut empas ari pengerembai pemansang ti digaga perintah dia.
“Dikena mantu mobiliti rayat ditu, renggat kedua ART deka digaga mansa Batu Kawa sebedau nuju Bau enggau Lundu.
“Jalai alun ba Batu Kawa tu mega majak sempit, nya alai jalai alun tambah deka digaga ari Batu Kawa nuju Matang sampai ke Yayasan Sarawak kin,” ku iya.
Abang Johari bejaku munyi nya lebuh bejadika Program Nasih Tanah Projek Rayat Ngaga Balai Lumba enggau Mensia Mayuh sereta Hab Inovatif Batu Kawa ditu, kemari.
Ku iya, jalai nya ila deka terus besambung nuju Palan Aum Borneo Kuching (BCCK) sereta jematan nuju ke Kota Samarahan.
“Kelia sida madah (Perintah Pakatan Harapan) menua kitai enda begunaka jematan, peda nama kes ti udah nyadi (kes entukar labuh di Feri Triso).
“Niang Datuk Patinggi Tan Sri Adenan Satem suba deka menua kitai nadai ngena feri agi lalu ngaga jematan bebas tol, nya ti diteruska aku.
“Kitai deka ngaga jematan lalu nadai ngena feri agi,” ku iya.
Tandu iya, ngaga jematan ukai ungkus belanja ti murah tang perintah mujur ngiga belanja bejalaika pengawa nya.
Seraya nya, iya madahka lebuh jalai alun udah ditambah baru rumah ulih diempu mega ulih digaga.
“Kitai bisi fomula ngatur perambu tu, aku deka madahka kita ila,” ku iya.
Ngelansa pekara bukai, Abang Johari madahka nengah Kaunsil Pemansang Ekonomi Sarawak (SEDC) siti stesen tiga dalam satu deka digaga ba Batu Kawa.
“Stesen tu deka nyadi stesen minyak, kuasa karan enggau hidrogen.
“Pengawa ngaga stesen tu chukup beguna dikena nyaga rampa menua,” ku iya.
Iya nyemetak ngelalau rayat anang bejudika jeman ti deka datai (don’t gamble your future) Sarawak sereta alah ujum orang bukai.
“Anang bejudika jeman ti deka datai kita.
“Tentu bisi orang deka mambarka kitai lalu pengawa nya dianggap sida nyadi peluang ke berega.
“Ketuai ari PBB enggau SUPP endang udah diseridi nyadi ketuai ti manah ungkup semua rayat pupu bansa ngambika terus adil ngagai semua,” ku iya.