ART deka dikerembai ke Sibu

“Pengudah ART mujur dipejalai ba Kuching enggau Samarahan ila, kitai deka meri kandang menua bukai ngasaika perengka guna tu nyengkaum Sibu.”

SIBU: Perengka pengangkut mensia mayuh ngena Sistem Autonomous Rapid Transit (ART) deka dikerembai ngagai Sibu enggau kandang menua bukai dudi hari pengudah mujur ngatur operasyen ba Kuching-Samarahan datai ba taun 2025.

Kepala Menteri Datuk Patinggi Abang Johari Tun Openg madah, perintah nengah Gempung Parti Sarawak (GPS) bisi pelin besai ngemansangka sitak Sibu.

“GPS bisi agenda ungkup Sibu. Kitai deka nangkir menua tu besai agi nyengkaum Kampung Datu, Kemuyang, Bandar Moden Nangka Baharu, Bukit Assek sereta ngerembaika ART kitu.

“Pengudah ART mujur dipejalai ba Kuching enggau Samarahan ila, kitai deka meri kandang menua bukai ngasaika perengka guna tu nyengkaum Sibu,” ku iya lebuh bejaku ba Pengerami Ngelanchar GPS Zon 9 Sibu ba Dewan Suarah Sibu ditu, kemari.

Sama datai Sapit Presiden GPS Datuk Amar Douglas Uggah Embas, Presiden Parti Sa’ati Rayat Sarawak (SUPP) Dato Sri Dr Sim Kui Hian, Presiden Parti Rakyat Sarawak (PRS) Tan Sri Datuk Amar James Jemut Masing, Presiden Parti Demokratik Progresif (PDP) Dato Sri Tiong King Sing, Chairman GPS Zon 9 Sibu Dr Annuar Rapa’ee sereta temuai dipebasa bukai.

Abang Johari ti mega Presiden GPS andal amat Sibu ulih mansang jampat ari pelin enggau agenda dibai GPS, semina enti sida diberi rayat mandat ngatur pengawa.

Ku iya, mayuh macham pemansang baka Jalai Sibu Jaya – Lanang ke diatu benung chakah dipejalai, projek jalai baru Sepital Sibu – Kemuyang ti deka meri pangka besai ngagai rayat ari sukut ekonomi enggau ke bukai.

“Pia mega perambu ngemansangka baru genturung pendiau Bukit Assek. Kandang menua tu suah ampuh enggau napi penanggul baka denggi enggau ke bukai. Enti sema diberi mandat, kami deka ngemansangka endur tu.

“Kandang menua bukai diuan komuniti China, Melayu enggau ke bukai mega deka dikemansang. GPS ukai semina nemu besemaya tang endang ngamatka jaku. Pekara pemadu beguna diatu, mandat ari rayat kelebih agi sitak Sibu.

“Enti sema GPS megai kuasa, kami nemu nama pengawa patut dikereja ungkup peranak ditu,” ku iya madah nyemetak.

Abang Johari pechaya enti sema Sibu dikemansang enggau manah, ekonomi rayat deka disungkak sereta nyendiaka mayuh pengawa puang.

Ngelansa pasal pengawa bepilih deka datai, Abang Johari nyemetak madah lima penuduk sitak Bepilih Kunsil Nengeri (Dun) ba Sibu iya nya Dudong, Bukit Assek, Nangka, Bawang Assan enggau Pelawan deka milih chalun ti ulih menang aja.

“Sibu endang nyadi penanggul besai. Anjung chalun bediri, alah. Kitai diatu deka meri lima penuduk ngagai chalun ti ulih menang,” tambah iya.

Abang Johari ngarap pengwa ngelancharka GPS Zon 9 Sibu tu ulih nyadika pelasar sida ngerampas baru penuduk Dun dia nentuka pelin besai ungkup Sibu ulih dipejalai sereta meri pemaik ngagai peranak dia.

Ba lansa bukai, iya madahka polisi dipejalai GPS ukai ‘Flip-Flop’ baka Perintah Pakatan Harapan (PH).

“Perintah PH semampai nadai polisi ti nyata enggau tetap sereta suah berubah.

“Kelalu mayuh ‘Flip-Flop’ ari Perintah Besai diatu. Kami GPS bisi polisi ti tegap nempa Sarawak nyadi menua pemadu maju ba Malaysia datai ba taun 2030,” tandu iya.

Suara Sarawak