KOTA SAMARAHAN: Autonomous Rapid Transit (ART) ngena kuasa hidrogen keterubah Sarawak udah datai ari menua China sehari tu.
Premier Sarawak Datuk Patinggi Tan Sri Abang Johari Tun Openg madahka ART nya diatu benung sangkai ba Palan Penyangkai Kapal Senari.
“Engkeman endar kitai begelumu ditu, ART kitai pan datai ari menua China sehari tu, iya bisi ba Palan Penyangkai Kapal Senari din.
“Nya perengka pengangkut keterubah ngena energi hidrogen lalu aku nyelinting raban Universiti Malaysia Sarawak (UNIMAS) enggau Universiti Teknologi Mara (UiTM) di Samarahan ngena tu dulu,” ku iya.
Abang Johari bejaku munyi nya rambau Bejadi Palan Digital Tun Abang Haji Openg (TAHODC) di UNIMAS ditu pagi tadi.
Ku iya, ART nya ila deka ngubah gaya pengidup raban nembiak ti belajar ba universiti laban dipejalai nitih chara digital nyengkaum bayar automatik ngena Sarawak Pay.
