ARTIKEL

KENANG MANIS… Raban pengemeran seni kelingai begambar ungkup kenang ba program penutup Ekspo Kelingai Antarabansa Kuching 2024 malam ensanus.

Artis kelingai menua luar deka datai baru ke Sarawak

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Ekspo Kelingai Antarabansa Kuching 2024 nembuka pengawa enggau program nyuaka perais ngagai bala champion malam ensanus.

Pengerami pengelama tiga hari berunggu tu nerima timbal manah ari bala artis kelingai menua luar kelebih agi dalam mantaika penyelai main asal di Sarawak.

Champion Kategori Kelingai Realisme Billy Sarte madahka iya enda nyangka ulih mai pulai tropi ke Filipina nyerumba ekspo tu.

Pengempu kedai kelingai Hell Ink nya madahka iya keterubah sekali datai ke Kuching lalu keterubah sekali nyereta program dalam ekspo nya.

“Mengeri Kuching chukup manah, rayat Kuching mega kemerah enggau begulai.

“Keterubah iya aku takut laban enda kala datai kitu, tang udah kelama aku gaga begulai enggau bala bakih ngujung ke ulih nyadi champion,” ku iya lebuh dirandau Suara Sarawak, ensana.

Kelimpah ari nya, Desk Mullen ari Katribu Tattoo, Filipina madahka iya deka datai baru ke Kuching maya bisi program ekspo baka nya diatur taun baru.

Ku iya, taja nya keterubah iya datai ke Sarawak iya agi enda tepantup ati laban bedau raun sereta nimpai pemanah rampa menua di mengeri tu.

“Menua kita ditu kaya enggau main asal, aku agi deka datai kitu laban bedau bisi awak raun ngelawa sekeda palan di Kuching,” ku iya.

Desk ti nyadi champion pekit Kelingai Tradisional madah, kelingai ba tubuh iya nyadi kelai kaul main asal ari Utara enggau Selatan Philiphines.

BILLY Sarte ari Hell Ink Filipina

Nangkan nya, kelimpah kelingai tradisional enggau realisme, mega bisi dipekitka Kelingai Gaya Lebas enggau Kelingai Pemadu Manah Ninting Hari.

Kelingai Gaya Lebas dipenggi Han Tattoo Studio ke alai penuduk lumur dua enggau lumur tiga dipenggi Nagaia Tato enggau Xiao Qiang Tattoo.

Kelingai Pemadu Manah Ninting Hari dipenggi Jona, ke alai penuduk lumur dua enggau lumur tiga dipenggi Billy Sarte enggau Mitchrons.

PENELEBA BEREGA… Kru Kelingai Karibu ari Filipina, Jean Sioson (kiba), Jonathan Cena (dua kiba) enggau Desk Mullen (kanan) begambar kenang enggau tropi sida tiga.

Ekspo Kelingai Antarabansa Kuching 2024 diatur tiga hari belabuh kena 5 April nyentuk 7 April ba Balai Gerempung Nasional Dayak Bidayuh (DBNA).

BERITA LAIN

BERITA TERBARU