Asa berati atur dalam feri enda dititih

BETONG: Atur ke bisi dipandang ba dalam feri patut diteritka bala operator lalu mesti dititihka semua penguna.
Chairman Kaunsil Pengintu Khairat Islam Spaoh (Lakis) Dr Abang Ismail Abang Julhi madah, entara pekara ke ulih diperati diatu iya nya meresa semua tikas penerit adat.
“Enti kitai berati, atur ke bisi dipandang ba dinding feri enda berapa dititihka bala penumpang. Pia mega, operator feri pan kurang neritka atur nya.
“Nya alai pekara nya patut diperesa nyengkaum ngasuh bala penumpang dalam kerita nurun maya sida tama taula pansut ari feri.
“Amat sinu, berati ngelama tu aku meda pekara nya enda dikemerat,” ku iya madah ngagai Suara Sarawak, kemari.
Ku iya, entara pekara bukai ke patut diperati iya nya ngemanahka jelatung ba feri awakka likun diguna.
“Deriba ke agi baru tauka sida ti jarang ngena feri nyangka berasai rawan nyema feri enda diadu manah.
“Anang agi, penguna ke suah mega agi berasai irau maya nurun enggau niki feri.
“Dikena nambahka agi pekara nya, patut bisi digaga pagar kiba enggau kanan dikena nyeliahka tayar entukar ngelebus,” ku iya.
Abang Ismail mega madahka diri berasai asa enggau atur nguna jiket pengelikun baka ke nadai reti.
“Aku beratika nya enda kala diguna, tang semina ditusun ba siti endur.
“Ba penemu aku, chukup irau laban enti bisi nyadi penusah enda disadang, kitai nyau kusil-kusil deka ngambi nya.
“Aku ngasaika, semua tu patut dikemerat laban perengka guna ba pengangkut feri tu agi beguna laban pendiau rampa menua Sarawak ngembuan mayuh sungai ari Telok Melano nyentuk ke Lawas,” ku iya.
Berebak enggau nya merambu Perintah Sarawak berunding enggau Perintah Pulau Pinang meli tauka minjau feri sida ke nadai agi dikena laban nya engkeman diguna ba sumgai ke besai baka Batang Lupar kelimpah mayuh utai undan.

Suara Sarawak