Asa, isu peranak menua dipolitik

Fatimah asa enggau surat ari perintah besai bekaul enggau undang-undang peranak menua

KOTA SAMARAHAN: “Taja asa aku deka meda dulu nama pekara deka dikunsi tauka dipadah Menteri Dalam Menua Malaysia Tan Sri Muhyiddin Yassin Hari Satu ila,” ku Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah.

Iya ti madah chukup asa enggau surat ti diterima kena 22 Julai tu tadi madahka Komiti Khas Sarawak dikinsil bekaul enggau undang-undang Peranak Menua Pekara 15A konstitusyen Perintah Besai taja nya beguna dikena ngelengkaska peminta peranak menua lebih agi ungkup rayat nengeri tu.

“Kitai ninga timbal ari piak menteri dulu baru kitai ngaga nama ti patut laban diatu kitai bedau nerima sebarang timbal.

“Aku dipadahka bisi sebuah pengerami meri setipikit status peranak Hari Satu tu ila ti dikemujurka Tan Sri Muhyiddin Yassin, engka maya nya bisi pekara deka dipadah iya,” ku iya.

Datuk Sri Fatimah Abdullah

Fatimah bejaku munyi nya lebuh ditanya pemberita maya ngulu Pengerami Penutup Orang Nyelai Pendiau (OKU) Got Talent ba sebuah palan bebeli barang ditu, kemari.

Iya madah engka mega Muhyiddin deka respon ngagai tanya bala sida pemberita maya nya ila tang iya madah diri enda ulih betemu mua enggau Muhyiddin ketegal bisi pengawa bukai.

“Engka mega maya nya ila iya deka respon ngagai tanya bala kita nya kebuah diatu aku deka meda dulu.

“Aku maya nya nadai ulih betemu mua enggau ila laban bisi penemuai rasmi ngagai Perth bekaul enggau sekula ‘insklusif’ pelajar tumu nembiak,” ku iya.

Ku iya, kenyau Komiti Khas Sarawak nya ditumbuhka Oktober 2016 nyentuk ngagai Jun 2019 sida bisi nerima 723 peminta, 127 peminta udah dikemendar bulih setipikit peranak menua lalu ke bukai agi bedau.

“Maya nya komiti tu ditumbuh enda rasmi (atas budi bicara) laban aku empu betemu enggau Datuk Seri Zahid Hamidi ti maya nya benung megai tanggungpengawa nyadi Menteri Dalam Nengeri Malaysia ketegal mayuh kes peminta peranak nembiak enggau bisi isu tinggal besekula sereta enda ulih nerima perengka guna bukai ti disediaka perintah ti nitihka undang-undang Peranak Menua Pekara 15A konstitusyen Perintah Besai iya nya ngagai nembiak ti beumur 21 taun ke baruh.

“Aku maya nya endang meri fokus ngagai pelajar nembiak laban sida nadai bulih pelajar ti ngujungka pekara nya nyadi penanggul rama anak tu baka nadai bulih pelajar, kereja enggau nerima pekara bukai sebaka nembiak ti bisi ngembuan peranak menua,” ku iya.

Ku iya, pengudah perintah berubah iya betemu enggau Muhyiddin lalu pemutus ti diulihka maya nya positif.

Fatimah nandu, komiti tu beguna laban peminta peranak menua ulih digaga lengkas agi ngagai nembiak ari proses bukai.

“Tang surat 22 Julai madah bisi komiti baru udah digaga lalu ngujungka komiti khas kami nya tadi dikinsil, aku berasai chukup asa.

“Aku empu ngasaika penanggul ti diasaika bala nembiak enggau apai indai sida kelebih agai sida ti mimit penatai pemisi,” ku iya.

Nangkan nya, iya mega ngasaika pekara pasal peranak menua tu digaga enggau tuju politik.

“Aku pechaya pekara tu digaga nyadi politik nya kebuah aku besampi enggau ngarapka bisi pemutus positif pasal tu ila,” ku iya.

Suara Sarawak