Asadia belajar nebah belikan, sape bemalinka dokumentari

KUCHING: Akademi Gerempung Dayak Iban Sarawak (Asadia) nguna inisiatif diri empu ngangkat baru main asal sape enggau belikan.

Inisiatif tu dipunka Asadia ari ke meda main lama nya udah lama punas lalu patut bendar diangkatka baru lebih agi dikerembai ngagai rebak dudi.

Ketuai Asadia Mabong Unggang madah, kepenudi iya belikan bisi diayan ba dokumentari ke digaga Tom Harrison ba taun 1958 suba.

“Ketegal nya Asadia ti ngemeranka pengawa ngerembai main lama bansa kitai ngasaika pekara nya patut diajar ngagai semua kitai lebih agi ngagai rebak baru.

“Ari pengeransing tu Asadia bemalinka dokumentari belikan Tom Harrison ngatur kelas nebah belikan enggau sape,” pia ku iya madah ngagai pengarang berita, apin lama ke udah.

Mabong madah, kelimpah ari bemalinka dokumentari nya, gerempung sida mega bisi ngaga pansik bekaul sebedau muka kelas ngagai bala mayuh.

Iya madah, naka ke diatu, Asadia tau dipadah mujur ngidupka musik enggau perengka dikena main belikan lalu dikerembai sida nengah kelas diatur.

“Kelas belikan enggau sape ke diatur Asadia tu diajar Ngo Hawing.
“Pia mega, kelas tu tebuka ngagai sapa ke bisi pengerindu sereta pengeransing besaup ngangkatka main asal lama kitai enda ngira tuai besai tauka nembiak baru,” ku iya madah.

Nambahka jaku iya, Mabong mega andal nembiak rebak baru, kelebih agi sida ti udah tebilang ba dunya pemerindang bisi ati rindu sereta mantaika musik ngena belikan ngambika belikan majak pegari nitihka ubah dunya maya dia.

“Tuju kitai iya nya deka meda main lama semampai mengkang ulih dipeda nyentuk ke ila-ila.

“Tang seraya nya kitai andal pengawa enggau pengeransing tu bela disukung rebak baru,” pia ku iya madah baru.

NGETAN MAIN ASAL… Mabong (tiga kanan) enggau bala bukai begambar begulai enggau penyereta kelas belikan enggau sape ke diatur Asadia.

Suara Sarawak