Asadia nguna sistem ‘apprentice’ ngajar main asal Iban

KUCHING: Akademi Sarawak Dayak Iban Association (Asadia) deka ngena sistem ‘apprentice’ dikena ngemuntangka agi pengawa ngajar main asal Iban.

Ketuai Asadia Mabong Unggang madah, ba sistem tu, tiap iti kelas ke diatur, bisi siku penulung pengajar alai maya nya iya mega belajar seraya nyaup ngajar bala bukai.

“Laban peminta ari orang mayuh ti deka belajarka main asal ba Asadia majak betambah, dia kami ngena sistem tu.

“Ari nya, belabuh ari diatu bisi siku penulung pengajar ba tiap kelas Asadia deka nyaup ngajar ngambika pengawa ngajar nya mujur,” pia ku iya madah ngagai pengarang berita, kemari.

Mabong madah, sistem tu, sida ke deka belajar tang enda ulih ngenataika diri ba palan Asadia, sida tau belajar ba orang ke dituku nyadi ‘apprentice’.

TANKA MAIN ASAL…Mabong (duduk, tengah) enggau raban Kelas Ajat Indu renggat ke-13 Asadia.

“Pia mega, aku arap bala ‘apprentice’ tu ulih nyaup kitai ngerembaika main asal ba dini-dini alai sida diau.

“Ba dia sida deka ngarika kitai ngajar bala nembiak tauka mensia mayuh ti saum penemu ngetanka main asal,” ku iya madah baru.

Nerang enggau nyemetak agi, ku iya, sistem ‘Apprentice’ dikearapka ulih meri pengarap enggau pengeransing ati nembiak Asadia muka kelas main asal ba dini-dini alai sida dia.

Iya madah, enti semina ngarapka Asadia aja enda ulih laban nadai belanja ke chukup.

Ba pekara bekaul, Mabong mengkang nesau bala apai indai anang lembau nganjung anak sida belajarka main asal.

BELAJAR…Bala nembiak benung nitihka ayun jari pengajar Sia Limping ti disaup penulung pengajar tauka ‘Apprentice’ Anastasia.

Ku iya, ari jaku peransang apai indai bala nembiak deka ngembuan pengerindu ngetanka main asal bansa diri.

“Taja pia aku berasai temegah ati laban diatu bansa kitai mayuh mantaika pengeransing diri ti agi keran ngenan sereta ngangkatka main asal.

“Terima kasih ngagai bala apai indai ti enda belampang ati nganjung anak sida belajar ngagai kami,” ku iya nambah.

Ba tusun kelas Asadia, berengkah bulan Februari tu tadi, sida udah ngatur tiga bengkah kelas.

Kelas tu iya nya Ajat Indu Iban ti digulu 23 iku lalu ditangkan kelas Ajat Lelaki tauka Ajat Nurun Ngayau (14 iku) enggau Gendang Pampat (14 iku) kelimpah ngatur kelas Kuntau.

Naka kediatu palan belajar main asal Asadia iya nya di Opis Sadia, Kota Sentosa, Dewan SMK Wira Penrissen enggau Joy Fitness Center.

Nitih tusun bala pengajar ASADIA, kelas Kuntau diajar Guro Kilau Debis, Philip Ami (Gendang Pampat) enggau Pengajar Henry Guya (Kelas Ajat Lelaki tauka Ajat Nurun Ngayau).

Suara Sarawak