ARTIKEL

ASADIA puh ngangkat main asal ngagai menua pesisir

Facebook
Twitter
LinkedIn
WhatsApp
Telegram

KUCHING: Akademi Serakup Dayak Iban Sarawak (ASADIA) terus ngerembai sereta ransing mantaika main asal ngagai menua pesisir.

Tuai ASADIA, Mabong Unggang madah, bebekal ke pengeransing ati ti deka ngenan sereta nyungkak pengawa enggau pesaka asal Iban, ASADIA enggau bebendar deka ngerembai ke pengawa ngaga ngepan bansa Dayak.

LANDIK ENDAR… Tuai Rumah Duat (tiga kiba) mantaika pengelandik ngeraut kayu ngaga bungai jarau.

“Nya alai, kena 9 enggau 10 Disember tu tadi ASADIA bisi ngelawa Rumah Duat di Nanga Assam, Melupa ngajar nembiak dia ngaga tangu, bungai jarau enggau kain buri.

“Ba taun ke datai ASADIA deka ngajar ngaga sugu tinggi ngagai nembiak Rumah Duat, Nanga Assam, Melupa.

ASIL TANGU… Bala nembiak Rumah Duat mantaika asil tangu ti digaga sida nengah kelas ti diatur ASADIA kena 9 enggau 10 Disember tu tadi. Sama bisi dipeda, Timothy (duduk).

“Hari ti kepenudi, nembiak rumah panjai nya, udah ulih mandangka asil pemujur sida belajar sereta ngaga kereban pesaka baka tangu, bungai jarau enggau kain buri,” ku iya madah ngagai Suara Sarawak.

Ku Mabong, iya sereta raban ASADIA meri terima kasih besai ngagai Kaban Kunsil Nengeri (ADUN) Krian, Friday Belik ti udah meri sukung sereta belanja ngatur kelas ngaga kereban asal Iban di Rumah Duat.

“Aku ngarapka mayuh agi kelas ti baka tu ulih diatur ba menua bukai, ngambi perengka asal bansa kitai meruan pegari belama.

“Pia mega, aku andalka sida ti udah landik ngaga kereban asal tu ukai semina ulih ngaga ungkup diri empu tang ngaga mayuh agi awak bisi dijual sereta dipandang ngagai orang bukai.

“Ari pengawa nya, sida ti nadai nemu ngaga ulih meli sereta ngembuan kereban asal bansa kitai nya tadi,” ku iya.

Ku Mabong, nengah chara nya mega pengelandik ngaga kereban asal ulih digaga nyadi siti ari jalai nyungkakka ekonomi diri empu.

Nangkan nya, iya ngarapka nembiak ari Rumah Duat sama ulih ngerembai sereta nyungkakka main asal enggau perengka asal bansa.

Berebak enggau nya, pengawa ti diatur ASADIA tu udah narit ati siku nembiak nyelai pendiau Timothy Jemat belajar ngaga kereban asal Iban.

“Aku meri terima kasih besai ngagai ASADIA laban udah meri peluang ngagai kami serumah belajar ngaga kereban asal kitai Iban.

“Aku ngarapka diri ulih enggau orang besemekih ngaga tangu enggau buri dikena nambahka penatai pemisi jemah ila laban aku merambu bejual kereban tu dikena ngiga anak belanja,” ku iya.

Pia mega, siku indu rumah panjai, Siawmui Siku mega gaga ati udah mujur ngaga sereta landik ngaga tangu enggau kain buri.

Siawmui mega meri besai terima kasih ngagai ADUN Krian Friday Belik ti udah meri perangsang sereta belanja dikena raban ASADIA ngatur kelas ngaga bungai jarau, tangu enggau kain buri.

“Aku ngarapka penemu enggau penau ti dipelajar ari kelas ulih dikena nambahka penatai pemisi sereta meransang nembiak bukai ingin deka belajar kereban bansa kitai Iban ti bukai baka sugu tinggi,” ku iya.

LAIN-LAIN BERITA

Lebih 360,000 ngusung Muzium Budaya Borneo

KUCHING: Muzium Budaya Borneo (BCM) ngerikod lebih 360,000 pengusung sepemanjai taun 2023. Menteri Dagang Temuai, Industri Kreatif enggau Seni Pemerindang (MTCP), Datuk Seri Abdul Karim

Mi kolo digazet nyadi Pemakai Pesaka Menua

KUCHING: Pemakai ti dikerindu mensia mayuh di Sarawak, mi kolo diatu udah digazet nyadi siti Pemakai Pesaka Menua tauka ‘Makanan Warisan Kebangsaan’. Pekara nya mega

Batu Kawa deka bisi ‘water park’

KUCHING: Peranak ba Sitak Kunsil Nengeri (DUN) Batu Kawa deka terus ngasaika transformasyen pemansang lebuh pengawa ngerichah peluang dagang temuai ari perambu ngaga taman rekreasyen

BERITA TERBARU