ARTIKEL

Asai enda pechaya ninga iya kena timbak

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: “Iya tetap nyadi bujang berani ba kem sida,” ku Shima Mustapha, 29 taun bini niang Koperal Langit, Sharif Mohd Siddiq Al-Attas Wan Sabli iya nya siku soldadu langit ti midang kena timbak kena 13 Ogos tu tadi.

Shima madahka iya asai enda pechaya keterubah nemu berita pasal laki iya ditimbak lebuh ditusi entua iya ke lelaki.

“Aku ngumbai orang bukai ti kena timbak, tang udah aku ninga nama iya disebut baru aku pechaya.

“Iya nyadi bujang berani ba kem sida laban iya pemadu kering nat ke diri nyentuk datai di sepital,” ku iya lebuh ditanya pemberita pengudah ngatur pengawa nguburka Sharif Mohd Siddiq Al-Attas di Pendam Kampung Melayu Siniawan Sebereng ditu, kemari.

Iya ti baru tembu bepenti anak ketiga seduai madahka, niang laki iya sigi enggai jauh bini enggau anak.

“Nya kebuah aku ari jauh sanggup diau enggau iya ditu nyentukka iya tama dalam tanah, laban iya sigi enggai jauh bini enggau anak.

“Maya iya nurun gawa, iya mesan deka pulai merarau enggau kami menyanak,” ku iya seraya ngerendut tambai Malaysia ti disua ngagai iya nyadi kelai laki iya siku ari bujang berani ti udah midang.

Niang Sharif madamka seput di Sepital Jantung Kota Samarahan, ditu lebuh diperubat ketegal balat bakal pengudah ditimbak maya benung bejalaika pengawa di Kem Skuadron 330 Soldadu Langit Diraja Malaysia (TUDM) di Kota Samarahan.

Iya ninggalka siku balu enggau tiga iku anak ke beumur lima taun, tiga taun enggau tiga bulan. Niang mega kala gawa di Kem Kepala Batas, Kedah sebedau pindah ke Sarawak.

Kelimpah ari nya, menyadi biak Sharif iya nya Sharif Mohamad Syukri Al-Attas Wan Sabli, 15 taun madahka kepenudi iya betemu enggau niang maya beguntin buk lemai 12 Ogos.

“Maya iya beguntin buk aku bisi berandau enggau iya, aku endang rapat enggau menyadi aku tu laban aku ti nulung iya ngechat rumah baru iya.
Lalu bedau datai setaun iya diau ba rumah baru nya,” ku iya seraya nyabak.

Syukri madahka menyadi iya nadai sempat ninggalka pesan sereta nadai nunjukka kelai nyelai sebedau nya.

Pengawa nguburka niang kemari diserumba enggau hari ujan bangat digulu raban soldadu langit enggau ruang bilik niang.

Sama bisi datai meri basa kepenudi ngagai niang iya nya, Panglima Wilayah Langit ll Mejer Jeneral Datuk Shamsudin Kassim enggau ke bukai.

BERITA LAIN

BERITA TERBARU