ARTIKEL

AWANG TENGAH ALI HASAN

Asil dagang nambah 23.8 peratus

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

BANDAR SERI BEGAWAN: Penyampau dagang entara Sarawak enggau Brunei Darussalam nambah 23.8 peratus, manggai RM3.76 bilion ba taun 2023.

Sapit Premier Sarawak, Datuk Amar Awang Tengah Ali Hasan madah, penyampau dagang nya nambah dibanding RM3.04 bilion ba taun 2022.

“Kerejasama rat entara kededua menua tu tentu deka nambahka agi penyampau dagang dudi hari.

“Nya kebuah bemacham inisiatif dipejalai dikena ngemuntang dagang entara Brunei enggau Sarawak kelebih agi nengah ekspo dagang,” ku iya.

Awang Tengah mansutka jaku nya ba Pengerami Makai Lemai Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar enggau bini, Toh Puan Fauziah Mohd Sanusi Begulai enggau Diaspora Sarawak di Opis Suruhanjaya Tinggi Malaysia ke Brunei Darussalam, malam ensanus.

Berebak enggau nya, Awang Tengah mantaika pengandal iya senentang pemansang Jalai Besai Tebing Tasik Utara (NCH) ti deka disambung enggau rentayan jalai besai Brunei Darussalam deka meri pemaik ngagai kededua raban.

“Pemansang infrastruktur jalai besai tu endang deka ngemuntangka agi dagang enggau pengawa beranakka puku entara Brunei enggau Sarawak.

“Perintah Sarawak mega deka negapka agi kerejasama ari sukut telekomunikasyen dikena nyendiaka penyambung ba adan menua,” terang iya.

Nangkan nya, Kuasa Usaha Sementara Suruhanjaya Tinggi Malaysia ke Brunei Darussalam, Nur Ezira Mahadi madah, Brunei nya bakih dagang dunya Ke-30 pemadu besai Malaysia enggau penyampau dagang manggai RM10 bilion ba taun 2023.

“Suruhanjaya Tinggi Malaysia di Bandar Seri Begawan ngelaluka pengawa numbuhka Opis Dagang enggau Dagang Temuai Sarawak Brunei (STATOB) taun tu seraya negutka agi kaul kerejasama ekonomi entara Brunei enggau Sarawak,” ku iya.

BERITA LAIN

BERITA TERBARU