Asil kraf ari Betong dipekit ba SHTA Ke-8

BETONG: Biro Indu Bebanggai Kanan taun tu betuah amat pengudah dipilih nyadi sebagi ari chalun Sarawak Hornbill Tourism Award (SHTA) Ke-8 2017/2018.

Nitihka penerang dikunsi ba laman Page Facebook Adun Layar, Gerald Rentap Jabu, pengawa ngakim asil pengelandik jari biro nya udah diatur kena 11 September tu tadi di rumah panjai sida.

Bala akim ari SHTA ngelimpangka awak diri ngelawa genap penyereta laban deka meda empu chara sida ngaga asil pengelandik jari nya.

Kelimpah ari nya, tuju bukai deka ngerandau bala penyereta kelebih agi pasal utai ditengkebang ti meri pengelebih enggau penyelai ngambika dipadu nyadi pemenang.

Gerald nengah penerang nya mega meri tabi puji ngagai Biro Indu Bebanggai Kanan ti mujur ngayanka asil pengelandik jari enggau kain tenun sida.

LANDIK… Bala kaban Biro Indu Bebanggai Kanan benung kiruh beranyam.

Entara asil pengelandik jari bisi dipandang ngambika diakim iya nya bakul, penangkup pemakai enggau kantung sandik ke dianyam ari tali plastik, sugu tinggi enggau pua kumbu sereta ke bukai.

Biro Indu Bebanggai Kanan deka diakim ba sebengkah agi kategori ungkup anak raga Iban.

Nya alai Gerald besampika sida nya deka teulihka pemujur sereta bulih peneleba baru kelimpah mai nama menua Betong pegari dipeda.

Ku iya, pengawa baka tu patut ditunda peranak rumah panjai ke bukai nyadi sebagi agi pemansut ekonomi enggau nambahka belanja ruang bilik sereta ulih ngerapitka kaul begulai enggau pangan diri.

SHTA nyadi pengerami ninting taun diatur begulai Opis Menteri Dagang Temuai, Seni enggau Main Asal, Opis Menteri Nembiak enggau Lumba Sarawak enggau Kaunsil Dagang Temuai Sarawak (STB) ti nyendiaka semilan kategori besai nyengkaum enggau 31 kategori mit.

Bala pemenang anugerah deka nerima Trofi enggau Setipikit SHTA, Insentif Mata Duit penyampau RM5,000 enggau Insentif Ngelakuka Dagang RM3,000.

Kelimpah ari nya, bala pemenang Anugerah Khas Kenyalang deka nerima Trofi Anugerah Dagang Temuai Kenyalang Sarawak enggau setipikit sereta insentif mata duit penyampau RM10,000.

ALUS… Sekeda bakul dianyam ari tali diplastik entara chara tengkebang baru dunya moden.

 

KERANJAI JARI… Asil pengelandik jari dipandang bala kaban Biro Indu Bebanggai Kanan ngambika diakim.

Suara Sarawak