ASP Aldrin Gonda, Bujang Berani menua

KUCHING: Penyulai siku anak Sarawak ti nyadi Ketuai Unit Narkotik Indu Opis Polis Pelilih (IPD) Kota Setar Asisten Superintenden Aldrin Gonda ti bebadi nyawa lebuh ti bejalaika pengawa nyerumba Atur Tagang Pejalai (PKP) kemari patut digelar Bujang Berani menua.

Siti ari komen penguna media rama (facebook) ti ngenataika penyinu ari ngagai niang ngena nama Adli Kiprawie nyebut niang sulai baka bujang berani ketegal bansa enggau menua enda ngira ba dini iya gawa asal iya ba tanah Malaysia iya tetap tau digelar bujang berani rayat Malaysia.

“Enda ngira ba dini alai nuan gawa asal aja ba tanah Malaysia nuan tetap dikumbai bujang berani rayat Malaysia,” ku iya.

Udah nya, siku agi komen penyinu ati nuju niang datai ari penguna media rama benama Tenny Thad madah diri kala begulai gawa enggau niang Aldrin. Ku iya, niang siku orang ke badas…penyulai iya nyau baka lenyau diri sebala.

“Bisi sekali maya pulai bejalaika pengawa (datai ngenyit), iya mai aku nikal baru ketegal sinu meda ruang bilik OKT ti baru ditan. Niang meri duit RM100 ngagai bini OKT nya laban iya nemu sida tu idup seranta nyentuk tong berau pan puang. R.I.P Tuan,” ku iya.

ENDA DISADANG…Gaya entukar polis ti dikena niang maya penusah bebadi pagi kemari.

Penusah ke nuntung niang nyadi urung pukul 11.30 pagi kemari ba lampu trafik Arkib Negara, Jalai Mentaloon ngujungka niang Aldrin parai tekala nya.

Ketuai Polis Pelilih Kota Setar, Asisten Komisioner Mohd Rozi Jidin madah, penusah tu nyadi lebuh entukar dikena pemesai polis beumur 38 taun nya begulai enggau dua iku kaban ari Kanchut nuju ngagai Pantai Johor pengudah nerima ripot nangkap orang ba Pantai Johor.

“Taja pia, entukar nya ensayar ba lampu trafik pengudah nyeliahka sebuah motosikal ti ngenyit nguing ari jalai sepiak kiba ngagai sepiak kanan.

“Penusah bebadi ba jalai alun tu ngujungka niang parai tekala nya seraya dua iku agi kaban iya udah dianjung ngagai Sepital Sultanah Bahiyah (HSB) Alor Setar,” ku iya nerang lebuh dirandau ba Unit Forensik HSB ditu.

Kededua kaban iya ti beumur 26 taun nya bakal ba pala enggau kaki.

SINU…Komen ari mensia mayuh.

Ku Rozi, PDRM lenyau siku kaban polis ti manah laban niang tu siku orang ti sikar gawa lebuh bejalaika pangku pengawa ba IPD Kota Setar kenyau tiga taun ke udah.

“Diatu, kami benung ngelala motosikal nya enggau penusah tu nyadi kelalu jampat lalu bisi saksi bisi tepedaka motosikal nya nguing ari kiba ngagai kanan enggau lenyau pengudah penusah tu nyadi.

“Nya alai, aku minta pengempu motosikal nya ngagai balai polis ngambi mantu pansik kes tu,” ku iya.

Nambahka nya ku iya, niang udah ninggalka siku balu enggau siku anak beumur enam taun lalu PDRM deka nganjung bangkai iya pulai ngagai Serian pengudah semua atur ditu tembu magang.

Kelimpah ari nya, kes nya dipansik di baruh Seksyen 41(1) Akta Pengangkutan Jalan 1987.

SINU…Komen ari mensia mayuh.