KUALA LUMPUR: Ratu terejun menua, Datuk Pandelela Rinong ngarap ke projek ‘Road To Gold’ (RTG) meri perati ba pengawa nyendiaka baru servis sukung ke meruan agi ngagai atlit nasional.
Pandelela madah, iya nerima servis sukung baka tim sains lumba lebuh bepekit ba dua dua Olimpik iya nya edisyen 2012 di London, United Kingdom enggau edisyen 2016 di Rio de Janeiro, Brazil ti nyaup iya bulih midul ba lumba pemadu besai dunya nya.
“Ngarap ke udah tu servis sukung nya meruan agi, anang belega baka ba London enggau Rio kami bisi tukang urut enggau biomekanik lumba tang lebuh Tokyo 2020 nadai disedia,” ku iya ba Pekit Terejun Renggat Umur (MIAG) Ke-58, ditu kemari.
Ku iya, atlit terejun begunaka analisis video lebuh belatih enggau pekit lalu pedis sida mantai ke pengelandik diri enti nadai sukung nya.
Pandelela nurai sejarah pengudah nyadi atlit indu keterubah menua bulih midul engkeraju ba Lumba Olimpik edisyen 2012 ba lumba 10 meter (m) platform lalu udah nya bulih midul pirak ba lumba 10m platform seirama, begulai enggau Cheong Jun Hoong, ba edisyen 2016.
Bulan nyin tadi, Opis Menteri Nembiak enggau Lumba (KBS) mantai ke pengawa numbuh tim projek RTG enggau tuju nyeraris inisiatif menua bulih midul emas keterubah ba Lumba Olimpik.
Nambah ke nya, atlit ari Sarawak nya andal ke tim penerejun junior ulih nyulut sereta ngetan ke penuduk Malaysia ba Lumba SEA 2023 di Phnom Penh, Kemboja.
Ba bulan Januari tu tadi, penulung jurulatih Datuk Leong Mun Yee madahka tim terejun elit nadai masuk Lumba SEA 2023 di Kemboja, ngambi meri peneleba ngagai penerejun biak ba renggat antarabansa.
Dulu ari nya, Pandelela ti ngarika tim nasional mujur bulih midul emas ba lumba 10m platform nengah 326.05 mata ditangkan penerejun Sarawak, Eilisha Rania Abrial Rajagopal (235 mata) enggau pengari Singapore, Ong Rei En bulih midul engkeraju (208.25 mata).
Pandelela mega madahka diri lantang ulih bepekit baru pengudah kepenudi bepekit ba Grand Prix (GP) Fina bulan November 2022.
Ku iya, pekit serak tu nyadi pelasar nyikap diri napi Pekit Terejun Dunya 2023 ba Montreal, Kanada kena 5 ngagai 7 Mei tu.
Nangkan nya, penerejun nasional nguasa podium ba lumba acara 10m platform lelaki nengah Bertrand Rhodict ti bulih 404.15 mata enggau ngempu midul emas, ngalahka Jellson Jabilin ti bulih midul pirak (372.10 mata) seraya Enrique Maccartney bulih midul engkeraju (338.75 mata). – BERNAMA
