KEMBOJA: Atlit Sarawak ti ngarika Malaysia ba Lumba Para-ASEAN Ke-12 ba Kemboja mujur ngumpul 13 midul emas.
Menteri Pemansang Indu, Nembiak Mit Enggau Pengelantang Komuniti, Datuk Seri Fatimah Abdullah madah, pemutus nyulut bulih midul emas nya datai ari tujuh atlit para menua.
“Mohd Adib Iqbal, Fraidden Dawan enggau Mohd Nur Syaiful bela mujur bulih midul emas tiga iti siku lalu Rusdianto Rusmadi bulih siti midul emas ba lumba nyemerai.
“Pia mega, Nicodemus Manggoi bulih dua midul emas ba lumba powerlifting, Mohd Farissan enggau Khairulnizam Engkeh bela bulih siti midul emas ba lumba Main Bol CP 7-a-side.
“Nangkan nya, kitai mujur bulih 12 midul pirak ari enam atlit para menua,” ku iya.
Fatimah mansutka jaku nya ba sebengkah penerang media ti dikunsi ngagai bala pemberita nengah aplikesyen WhatsApp kemari.
Ku iya, atlit ti bulih midul pirak nya baka Azlan Mos enggau Bryan Junency ti bela bulih midul pirak dua iti siku.
Udah nya, Bibiana Ahmad bulih siti midul pirak ba lumba powerlifting, Rusdianto Rusmadi bulih empat midul pirak, Fraidden Dawan bulih siti midul pirak ba lumba nyemerai enggau Gloria Gracia Wong bulih dua midul pirak ba lumba ping pong.
Entudi ke nya, atlit Sarawak mega mujur bulih 10 midul engkeraju ari Freday Tan ti bulih dua midul engkeraju ba lumba basketball enggau Fraidden Dawan bulih tiga midul engkeraju.
Pia mega, Mohd Nur Syaiful bulih dua midul engkeraju ba lumba nyemerai lalu ba lumba powerlifting, Bibiana Ahmad mujur bulih siti midul engkeraju, Abdul Razzaq bulih siti midul engkeraju ba lumba boccia enggau Ashley Irenaues Jeck bulih siti midul engkeraju ba lumba badminton.
