PENAU atlit Sarawak ba Lumba Para Asean, Kemboja 2023 nyata pedis dialah enggau majak ngemegah.
Kemari, tiga ari sida mujur nempa nama nambahka midul ungkup menua nengah lumba nyemerai.
Nya nyengkaum dua midul emas enggau siti midul pirak.
Atlit nyemerai ti chukup bepeneleba, Fraidden Dawan (S10) mujur bulih midul emas kedua nengah kategori 200 meter gaya bebas.
Siti agi midul emas ari lumba nyemerai nya dipenggi Muhammad Nur Syaiful Zulkafli (S5) ungkup kategori 50 meter gaya bebas.
Lebih manis, peranak asal Kampung Tajo, Asajaya mega nempa rikod baru (33.14 sikin).
Nangkan nya, siku agi atlit nyemerai Sarawak, Rosdianto Rusmadi (SM8) udah bulih midul pirak ba kategori 200 meter gaya bebas.
Bisi mega bekunsi pemujur atlit nya Menteri Pemansang Indu, Nembiak Mit enggau Pengintu Pengelantang Komuniti, Datuk Seri Hajah Fatimah Abdullah enggau Sapit Menteri Pemansang Indu, Nembiak Mit enggau Pengintu Pengelantang Komuniti, Mohamad Razi Sitam ba Kemboja diatu.
