KUCHING: Penyampau 3,510 iku Raban Soldadu Malaysia (ATM) Sarawak deka nerima vaksin Pfizer BioNTech Covid-19 ba renggat keterubah Program Vaksinasyen di nengeri tu.
Panglima 1 Divisyen, Mejar Jeneral Datuk Dzulkafli Mustaffa madahka ATM di selampur Sarawak diungkupka nerima 7,020 dos vaksin Covid-19 berengkah ari bulan Februari 2021 nyentuk Februari 2022 ti deka datai.
“Pagi tu (kemari) di Kuching, penyampau 120 iku raban ATM (Soldadu Darat enggau TUDM) nerima vaksin.
“Kami meri dulu vaksin ngagai raban ATM ti gawa ba begian pengerai, raban ATM ti diau ba zon mirah, raban ATM ti deka diatur gawa nyaga garis entara menua Malaysia enggau Indonesia, raban ti deka nyereta Op Teras enggau Op Benteng di Sabah, raban ATM ti gawa ba markas enggau raban sukung,” ku iya.
Dzulkafli bejaku munyi nya ngagai pemberita pengudah nyadi orang ti keterubah nerima Vaksin Pfizer BioNTech ba Balai Bekavu Kem Penrissen Batu 8 ditu, kemari.
Ku iya, kemari mega, dos vaksin ti sebaka dibai nuju raban ATM di Sibu, Bintulu enggau Miri.
“Kami deka semua raban ATM ba tiga bagi menua tu nerima vaksin serentai ketegal Sibu nyadi zon mirah enggau raban ATM di Miri deka gawa ba Sabah bulan April tu ila.
“Ungkup raban ATM ti benung ngawa nyaga garis entara, pengudah sida pulai ngagai kem baru sida deka nerima vaksin nyereta renggat kedua ila,” ku iya.
Iya ngarapka, semua raban ATM nyereta program nya dikena mutuska rentayan Covid-19.
Nangkan nya, Panglima 3 Briged, Brigedier Jeneral Datuk Azhar Ahmad madahka iya beterima kasih ngagai perintah sereta ketuai ATM ngemujurka program vaksinasyen nya kemari.
“Kami deka seruran bejaga sereta mantu perintah munaska Covid-19 di menua tu,” ku iya.
Berebak enggau nya, Komander Pengkalan Udara Kuching (TUDM), Kolonel Mohd Azwan Mohd Bohari lebuh ditanya kemari madahka bilun CN235 udah terebai ke Sibu, Bintulu enggau Miri pagi kemari.
“Naka tu (urung pukul 10 lebih) bilun nya udah singgah ba Sibu enggau Bintulu lalu benung dalam pejalai ke Miri.
“Ngarapka semua raban ATM din nerima vaksin sida enggau mujur,” ku iya.