Atur bekurung dipejalai ba Bintulu enti majak enda ngasika SOP

KUCHING: Komiti Penyangga Penusah Bagi Menua Bintulu (JPBBB) deka berundingka pengawa neritka atur bekurung ari pukul 6 lemai nyentuk 8 malam.

Kaban Parlimen Bintulu, Datuk Seri Tiong King Sing madah, sida mega engka deka neritka baru Atur Mindah Betagang (PKP) enti sema mensia mayuh majak enda ngasika Atur Mindah Betagang Belebas (PKPB) Atur Pengawa Standard (SOP).

Ku iya, kedai ba bagi menua nya semina ulih dibuka nyentuk pukul 8 malam aja ke alai sebarang pengawa rama enda dikemendar kelimpah ari penusah ngenyit tauka ngaul pengerai.

“Agi mayuh orang bekesegap sebelah luar taja udah jauh malam lalu pejalai trafik mega agi baka selama.

“Palan pemerindang enda ngasika atur, agi ngemendarka orang ke datai kia ngirup enggau begelumu ba kedai sida,” ku iya ba sebengkah penerang di Facebook.

Ku King Sing, atur bekurung engka deka dipejalai tumu enti mensia mayuh enggai meri kerejasama ba timpuh ti udah ditetapka sida.

Suara Sarawak