Atur kompaun sekula dituku pemungkal kluster Covid-19 patut diserenih

SARATOK: Langgur penemu ngasuh meri kompaun dikeluarka ngagai sekula pemungkal kluster Covid 19 enda engkeman.

Kaban Kaunsil Nengeri (Adun) Saribas,Mohd Razi Sitam madahka atur kompaun ngagai sekula ti ditemu nyadi pemungkal Kluster Covid 19 patut diserenih sebedau dipejalaika.

“Pengawa raban penerit adat baka Polis ti bejalaika atur kompaun endang manah dikena nagang pengerekai Covid 19 ari majak nyadi.

“Atur nya enda salah, tang pansik enggau silik dulu ari ni pun penatai kes nya nyadi sebedau terus meri kompaun ngagai sekula nya.

“Kitai nangi pekara tu ngenusah raban orang ti gawa ba sekula baka bala pengajar enggau ke bukai nyema sekula terus dikompaun.

“Arapka SOP ba sekula dikemanahka agi laban kitai nemu di sekula chukup mayuh nembiak,”ku iya.

Razi madah munyi nya nimbal penemu ti dibantaika Tuai Polis Pahang, Datuk Seri Abdul Jalil Hassan ba portal berita online ti madahka PDRM deka ngeluarka kompaun ngagai sekula ti ditemu nyadi pemungkal Kluster Covid 19 kemari.

Pia mega, ku iya atur perintah nengeri ti ngasuh nutup semua sekula ba zon mirah dipeda lebih engkeman agi ari meri kompaun ngagai sekula.

“Taja pia, SOP mesti dipatau sereta dipejalaika enggau terit ba genap zon ngambika mensia mayuh terus bejejaga.

“Nya alai,aku minta bala apai indai nembiak lebih agi ba pelilih Saribas terus ngasika SOP ba dedini alai,”ku iya seraya ngelalau apai indai terus matau tuju pemindah anak diri empu.

Udah nya, Razi minta barang sapa ti ngasaika diri bisi kelai kena rampit Covid019 patut lengkas nganjung diri beperesa ba sepital tauka klinik besemak.

Suara Sarawak