KUCHING: Perintah patut berati enggau berundingka atur nukar nama lisin senapang patah, ku Adun Kedup Martin Ben.
Ku iya, pengawa enggau atur nukar nama tu semina ulih dipejalai ngagai nama laki tauka bini, uchu, bala menyadi, orang ngibun ti diaku enggau ke bukai.
Iya mansutka jaku tu ba hari kelima Aum Keterubah Penggal Keempat Dun Sarawak ditu, kemari.
Belalauka kes ti kala nyadi di Pelilih Serian, bisi penanggul ba atur nyilih nama pengempu senyata ngagai anak pengudah anak iya bebadi nyawa ba sebengkah penusah bebadi.
“Tu ngujungka pengempu asal senapang patah nya enda ulih ngambi pulai lisin laban polisi diatu ti semina ngemendarka nama dipindah ari apai indai ngagai anak aja,” ku iya.
Pia mega ku Martin, iya ngapil enggau merambu raban Polis Diraja Malaysia (PDRM) numbuhka unit (seksyen) meresa senyata api di Opis Polis Tebedu ti besemak enggau Opis Pelilih Tebedu.
Bisi pematut ku iya laban Pelilit Mit Tebedu diatu udah diangkat nyadi pelilih menua dalam taun 2014 tang atur pengawa meresa senyata api agi dipejalai di Indu Opis Polis Pelilih Serian lalu ukai di Opis Polis Tebedu.
Berebak enggau nya, Martin mega merambu ngagai Opis Menteri Dalam Menua berundingka atur pengawa nyeridi, program nagang enggau meri penyedar ngagai bala komuniti di menua nya.
“Tu ngambika bala komuniti chakah agi ngaul diri nyaup raban nyaga pengelikun sereta munaska penyalah di garis entara menua di Sarawak.
“Nitihka penerang, mayuh penyalah baka enchuri, ngemai barang chara belalai enggau ke bukai seruran nyadi di garis entara menua kitai enggau menua sepiak Indonesia,” ku iya madah nyemetak.
