SIBU: Kaunsil Pelilih Menua Pesisir Sibu (MDLBS) merambu nempa Pengerami Ai ti nyadi program ninting taun sida baka Pengerami Ai Songkarn ba Thailand.
Chairman MDLBS, Kaunsilor Sempurai Petrus Ngelai madah, program nya ngembuan pengulih nyadi pematak bala temuai ari dalam enggau luar Sarawak.
“Pengawa ngatur Pengerami Ai taun nyin kemari mujur matak urung 5,000 pengusung lalu tebal agi sida endang peranak Sibujaya, mengeri Sibu enggau ari luar Sibu.
“Aku bisi dipadah Pengerami Ai Sibujaya tu nyadi sebengkah Pengerami Ai ti bisi ba Sarawak,” ku iya.
Sempurai mansutka jaku nya rambau bejadi Pengerami Sibujaya Renggat Kelima 2023 ditu, malam ensanus.
Iya madah, bepelasar pekara diperati iya, pengawa ngatur Pengerami Ai Sibujaya nya ukai semina nyadi produk dagang temuai lokal tang ulih nyadi program rama ungkup rayat pupu bansa.
“Kitai mega ngarap program baru, Maraton Mit Sibujaya ulih matak penyereta ari luar Sarawak lalu kitai andal tu ulih nyadi Maraton Antarabansa dudi hari,” ku iya.
Iya pechaya Pengerami Sibujaya ulih nyungkak ekonomi lokal nyengkaum meri peluang ngagai peranak dia ngaul pengawa dagang nengah pengawa muka bansal ba taba Pengerami Ria.
“Aku ngarap Pengerami Sibujaya tu mai empas manah ngagai peranak Sibujaya lalu ulih diatur ninting taun nengah pengawa nambahka kualiti aktiviti ba pengerami tu ngambi richah agi,” ku iya.
Entara aktiviti bukai ti bisi diatur beserimbai Pengerami Sibujaya 2023 kena 16 September nyentuk 8 Oktober tu baka Pekit Ratu Etnik Sibujaya, Pekit Pocho-Pocho Kreatif enggau Pekit Ngias Kek Mangkuk (Cupcake Decoration).
Pia mega, Kelas Tango, pengawa ngerejister Kenyalang Gold Card, Bantu Khas Orang Tuai enggau Pekit Dart bisi diatur.
Aktiviti besai ungkup hari kepenudi pengerami nya kena 7 Oktober tu baka Sibujaya Semi-Maraton, Pengerami Ai sereta Konsert Pengerami Sibujaya 2023 ti deka digulu Premier Sarawak, Datuk Patinggi Tan Sri Abang Johari Tun Openg.
