Atur ‘Pinchin Seringgit’ ba raban Polis ulih nagang penyalah makai suap

SARATOK: Langgur penemu ari Ketuai Polis Johor, Dato Ayob Khan Mydin Pitchay ba sebengkah portal berita di menua tu ke minta bala polis enda ngira bepangkat tinggi tauka baruh diketu tumu tauka dikumbai ‘Pinchin Seringgit’ ketegal penyalah makai suap sigi patut diidupka baru.

Kaban Eksekutif Tinggi DAP Dr.John Brian Anthony madah diri sigi nyukung buah penemu nya berindik ari kes penyalah makai suap ti majak nyadi lebih agi ba sida ti gawa polis.

“Atur Pinchin Seringgit tu udah kala dipejalai maya Tun Hanif Omar nyadi Ketuai Polis Menua taun 1980 kelia.

“Maya nya pengawa makai suap tu jarang bendar nyadi ba sida ti bepangkat baruh nyengkaum bala pemesai polis.

“Kebuah iya,laban nangi ke diri dibuai gawa tumu sereta enda bulih pinchin enti bisi ditemu ngereja penyalah makai suap.

“Atur baka tu mega mengkang dikena lalu dipelajaika ba menua luar baka Amerika Syarikat (US) enggau Britain.

“Nya alai,kitai jarang ninga bala polis ba menua luar ditangkap bekaul enggau penyalah makai suap lalu tu nunjuk atur baka tu (Pinchin Seringgit) sigi engkeman dikena bejera tauka nagang penyalah makai suap,”ku iya lebuh mansutka penemu bekaul enggau penerang dibantaika Ketuai Polis Johor bekaul enggau atur nya ensana.

Ku iya ke mega ex-Chairman Palan Penyangkai Kapal (BPA) Bintulu, penyalah makai suap tu dikenangika majak nyadi enti nadai atur ke terit baka atur Pinchin Seringgit tu lalu enda diteritka perintah menua.

“Kebuah pia,laban naka tu agi nadai ukum ke chukup ngasi dikena perintah nagang ulah ke enda menuku tu.

“Ari Pinchin Seringgit tu kebendar ulih meransang ulah ti manah ba raban polis awakka seruran lurus bejalaika pengawa ke pemaik enggau pengelikun rayat mayuh,”ku iya.

Suara Sarawak