MELAKA : Pengudah ngaga pemutus pansut ari palan aum besai maya pengawa mantaika penemu nyerumba Kongres Nasional PKR 2019 kemari, Sapit Presiden Datuk Seri Mohamed Azmin Ali enda datai ba hari kepenudi kongres pagi tadi.
Nitihka penerang dipansutka Bernama, bela enda datai iya nya Mandal Presiden Zuraida Kamaruddin, Ketuai Indu Haniza Mohamed Talha, Sapit Ketuai Raban Keadilan Biak (AMK) Muhammad Hilman Idham sereta Kaban Kaunsil Ketuai Tinggi (MPP) Amirudin Shaari, Mohd Rashid Hasnon, R. Sivarasa, Datuk Saifuddin Abdullah enggau Datuk Kamarudin Jaffar.
Nitihka atur kongres sehari tu (kemari), Mohamed Azmin, Zuraida enggau Haniza patut bejaku sebedau jurai penuh dibantaika Presiden Datuk Seri Anwar Ibrahim.
Kemari, sekeda Kaban MPP enggau deligit pansut ari palan aum besai lalu pekara nya utai ke enda disadang lalu meri peragam baru ngagai parti ke beumur 20 taun nya.
Pengawa mantaika penemu pengudah ke ngetu merarau dipeda sebagi Kaban MPP ninggalka panggau ditangkan beratus iku kaban deligit pansut enggau chara berenggat ngujungka setengan ari palan duduk ba palan aum nya puang.
Ba pekara ke bekaul, Mohamed Azmin madah iya ninggalka pengawa mantaika penemu rambau kongres nya laban panggau nya nyau nyadi palan ‘bejai orang’ diasai nuju iya.
Pagi tadi, Anwar enggau Chairman Kaunsil Penyanding Penemu PKR Datuk Seri Dr Wan Azizah Wan Ismail datai urung pukul 8.57 pagi ungkup pengawa kepenudi atur nutup enggau ngelanjarka kongres ngagai haribulan ke deka dipadah jemah.
