SERIAN: Kaban Parlimen Serian, Dato Sri Richard Riot Jaem andal Gempung Parti Sarawak (GPS) ulih menang semua lapan penuduk sitak Dun majoriti bansa Bidayuh ba Pengawa Bepilih Besai Nengeri (PRN) Sarawak Ke-12.
“Ulih menang (ba lapan penuduk DUN Bidayuh). Tang anang lawa, ba politik anang kelalu lawa,”ku iya pengudah bejadika Program PERKESO Begulai Enggau Kaunsil Pelilih Serian berambaika jaku ‘Prihatin Keluarga Malaysia Sarawakku Sayang’ ba Dewan Serbaguna SJK Chung Hua Serian, ditu apin lama ke udah.
Penuduk Dun Bidayuh nyengkaum Opar, Tasik Biru, Serembu, Mambong, Tarat, Tebedu, Kedup enggau Bukit Semuja.
Riot ke mega Duta Khas Menteri Besai ke Jipun, Republik Korea enggau Taiwan sereta mega nyadi Sapit Presiden SUPP madah sida patut gawa bebendar baru ulih menang ba penuduk nya.
“Undi ba jari pengundi, enti kitai lawa, ringat, kitai deka nesal, nya jaku aku, GPS ulih menang, tang anang lawa anang tinggi jaku, gawa bebendar,” ku iya.
Riot madah munyi nya laban udah gawa nyadi Kaban Parlimen pengelama tujuh penggal ngarika sitak Bidayuh nya.
Kelimpah ari nya, iya mega ngelalau bansa Bidayuh ba pengawa bepilih ti deka datai undi mih enggau pintar lalu peda rikod sida diatu (GPS) suba dikumbai BN.
