Bacha Indeks Pengamah Angin di Miri agi enda manah ke pengerai

Miri: Bacha Indeks Pengamah Angin (API) naka pukul 5 pagi tu tadi ngayanka tikas ngagai 188 tu dikumbai enda manah ke pengerai mensia mayuh.

Naka ke tengah ari tu tadi, baca API bisi nurun ngagai 172 tang agi ba tikas enda manah ke pengerai.

Kandang berapa minggu ti udah lalu bekau ari penusah angus kampung lalu diserumba enggau gaya hari ti rangkai ngujungka angin menua tu kamah enggau balat besebun.

Ketuai Raban Pengerara Api Enggau Penyah Penusah Zon 6, Supt Law Poh Kiong madahka, sebun tu nyadi ketegal gaya hari ti rangkai sereta angat.

“Mujur pagi tu tadi bisi ujan ba Kuala Baram enggau begian bukai di Miri. Tu beguna amat mantu kami ngerara api ti nganguska kampung,” ku Law.

NINGA PENERANG DULU…Raban bomba enggau soldadu mendingka penerang sebedau neruska operasyen.

Pagi tu tadi urung pukul 11.40 pagi ujan lebat nyadi ba begian tu ti nyadi ujan berekat ngagai mensia mayuh di menua tu.

“Ujan lebat pagi tu tadi nulung kami madam ke penusah angus ti nyadi ba kampung puang laban kami beguna ke ‘sukung’ tu,” ku iya.

Law nambah, operasyen diatu fokus ngagai kandang Curtin Sarawak Universiti. Bisi tiga iti palan kampung puang udah ditemu angus.

“Kami ngarap bisi ujan bangat nurun ngambika ulih mantu operasyen tu laban sekeda pun kayu udah ditemu bisi berasap ketegal kena tata ai ujan ba kandang endur ti angus,” ku iya.

Lima ejensi benung bekereja saritu enggau operasyen ngemata ke penusah angus nyengkaum Tim Langit Bomba Miri.

NINJAU KAMPUNG ANGUS…Supt Law Poh Kiong benung ba bilun terebai ninjau operasyen.

Bisi 68 kaban ari Bomba Miri, bala soldadu, Opis Parit enggau Entali Ai, Opis Mineral enggau Geosains Malaysia enggau Miri Radio Amatur bisi enggau operasyen tu.

Sida tu begempuru ba palan penyadi penusah angus kenyau ari pukul 4 pagi tadi.

Adun Piasau, Datuk Sebastian Ting, madah ujan lebat pagi tu kemari baka ke diajih.

“Aku ngarap ke ujan nurun bangat agi,” ku penemu iya.

Kena Hari Empat tu tadi, Sekula Primari (SK) Kuala Baram ll diasuh tutup ketegal penusah angus kampung puang ti nyadi enda jauh ari sekula nya.

Pangka pengamah kualiti angin tu tau ngeruga pengerai ba timpuh pandak baka batuk, mutah, pedis rekung enggau pedis mata lalu empas ba timpuh panjai ngasuh penyakit sengak, ‘kardiovaskular’ enggau tau ngachau pengerai untak.