Badu ngiga emas ba Gunung Tabai

KUCHING: Polis diatu ngaga pemutus nutup Gunung Tabai ngambika enda ditapatka mensia mayuh tu nguji deka ngali emas enggau nadai pemendar beduduk ari trajedi ti udah nabanka nyawa siku lelaki kena Hari Tiga tu tadi.

Kepala Polis Sarawak, Datuk Aidi Ismail madahka sida mega deka berandau enggau Opis Residen Kuching, Opis Pelilih Bau sereta Opis Tanah enggau Survei ngambi ngenukuka Gunung Tabai nyadi palan dijaga.

“Kami diatu deka nutup Gunung Tabai nya ari dilawa mensia mayuh.

“Pengudah gunung nya ditukuka nyadi palan dijaga, polis ulih nangkap enggau dawa sida ti ditemu tama nadai pemendar nitihka Akta Kawasan Larangan dan Tempat Larangan 1959,” katanya.

Aidi mansutka jaku nya lebuh dirandau pengudah Pengawa Bebaris Hari Polis Ke-214 ba Indu Opis Polis Kontinjen (IPK) Sarawak, ditu kemari.

Nya alai, Aidi ngelalau mensia mayuh anang ngiga emas ba gunung nya laban tau ngeruga pengelikun.

“Pengali tu tau ngeruga pengelikun sida empu laban chara dikena sida tu enda patut lebuh ngelambak lubang dalam gua,” ku iya nerang.

Siku pengali empas dipechaya bebadi nyawa pengudah lubang digali iya dalam gua nya runtuh lalu ninggang tubuh iya.

Naka tu, tubuh niang ti beumur 25 taun nya agi dilamun batu lalu raban nyidi enggau nyelamat (Sar) napi pemar mansutka iya ketegal lubang nya sempit sereta dinding lubang ti mudah runtuh.


Operasyen dipejalai raban Opis Bomba enggau Penyah Penusah Malaysia (JBPM) lebuh mansutka tubuh niang nya agi ditampung sehari.

Suara Sarawak